इशु पन्त
विराटनगर । भारी वर्षाका कारण शुक्रबार विराटनगरको जनजीवन प्रभावित भएको छ । विद्यालय, अस्पताल, सरकारी कार्यालय, बजार समेत शुक्रबार सुनसान बनेको हो । वर्षाका कारण विराटनगरका विद्यालय बन्द भएका थिए । यसैगरी अस्पतालहरुमा आउने बिरामीको संख्या समेत अति न्यून रहेको थियो । बजारमा हुने चहलपहल समेत प्रभावित भएको व्यापारीहरु बताउँछन् ।
पछिल्ला तीनदिनदेखि परेको पानी शुक्रबार दिनभर नै परिरहेका कारण सवारी आवागमन समेत न्यून देखिएको थियो । खाजा घर, होटल तथा रेष्टुरेन्टमा समेत ग्राहकहरु नगन्य मात्रै पुगेका छन् । पानी पर्दा चिया पसलमा भीड हुने भएपनि शुक्रबार पालतो मात्रै सेवाग्राही आएको दाज्जु चिया पसलका सञ्चालक सुमन खडकाले बताए । चियाका पारखीका लागि चिसो मौसम अनुकुल हुने भएपनि बाहिरै निस्कन नसक्ने अवस्थाका कारण संख्या न्यून रहेको बताइन्छ ।
सडकमा पानी भएका कारण समेत सवारीमा आउने जाने गर्नेहरु कम भएका छन् । त्यसले बजारका अन्य व्यापारमा समेत प्रभाव पारेको हो । माई सप लुगा पसलका सञ्चालक गोकुल आचार्यले बजारमा आउन जान नै समस्या भएका कारण ग्राहक नआएको बताए । उनले दिनभर पानी हेर्दै सटर खोलेर बसेको उनले बताए ।
