विराटनगर । विराटनगरस्थित हिमालय दर्शन कलेजले आफ्ना होटल म्यानेजमेन्टका विद्यार्थीहरुलाई चीनमा इन्टर्नशिप तथा रोजगारीको अवसर सिर्जना गरेको छ।
कलेजले निहाउ एडुकेसनल कन्सल्टेन्सी र चीनको वुहान टेक्नोलोजी तथा बिजनेस विश्वविद्यालयसँग यस सम्बन्धी सम्झौता गरेको हो।
कलेजका निर्देशक भेषराज पोखरेलका अनुसार विश्वकै ठूलो अर्थतन्त्र भएको चीनका प्रमुख होटल तथा रिसोर्टहरूमा विद्यार्थीहरूले सिक्ने अवसर पाउनेछन्। निहाउ एजुकेशनका बिबेक दाहालले विद्यार्थीहरूलाई चाइनिज भाषादेखि होटल म्यानेजमेन्टका विभिन्न विधामा तालिम दिइने जानकारी दिए।
दाहालका अनुसार यस्तो अवसर विराटनगरसहित पूर्वका अन्य कलेजका विद्यार्थीहरूका लागि पनि विस्तार गर्ने योजना रहेको छ।
