विराटनगर । विराटनगरका तीनजना युवा भन्सार छलेर अवैध रुपमा भित्र्याएको लत्ता कपडासहित उर्लाबारीबाट नियन्त्रणमा परेका छन् । विराटनगर–१५ का ३५ वर्षीय ओम जित साह, २२ वर्षीय अभिषेक चौधरी, २८ वर्षीय तरबेज अन्सारी तीनलाख ३७ हजार ६०० मूल्य बराबरको कपडासहित पक्राउ परेका हुन् ।
प्रहरीले विराटनगर १५ का ओमजित साह चालक रहेको को १ ह ६३०९ नम्बरको अटोमा भन्सार छली गरेका मालसामान ल्याईरहेको सूचनाका आधारमा चेकजाँच गरेको थियो ।
त्यस क्रममा उर्लाबारी–४ पूर्वपश्चिम राजमार्ग बक्रा पुलमा पश्चिमबाट पूर्व आईरहेको अटोमा एक हजार ९२ थान कुत्ता सुरवाल र २० थान सुरुवाल बरामद गरेको थियो । शनिबार उनीहरुलाई पक्राउ गरिएपछि अटोसहित सामान आवश्यक कारवाहीका लागि भन्सार कार्यालयमा बुझाएको जानकारी दिइएको छ ।
