विराटनगर । विराट आदर्श साहित्य मञ्चले आवर विराटनगरका समाचार संयोजक प्रेम देवानलाई 'आदर्श युवा सम्मान २०८१' बाट सम्मानित गरेको छ ।शुक्रबार विराटनगरको हाटखोलास्थित आरोहण गुरुकुलमा आयोजित 'सृष्टा र सिर्जना' को नवौं शृङ्खलामा देवानलाई सम्मान गरिएको हो । विगत १५ वर्षदेखि पत्रकारिता क्षेत्रमा सक्रिय देवानले समाजका विकृति, विसंगति र भ्रष्टाचार जस्ता विषयमा निरन्तर कलम चलाउँदै जनताको पक्षमा आवाज उठाउँदै आएका छन् ।
कार्यक्रमका अध्यक्ष भेषराज पोखरेल, प्रमुख अतिथि विवश पोखरेल र विशेष अतिथि खेम नेपालीले देवानलाई १० हजार रुपैयाँको चेकसहित खादा, माला र सम्मान-पत्र प्रदान गरे ।
यसैगरी हिमालयन लाइफ इन्स्योरेन्स कम्पनीका प्रादेशिक कार्यालय शाखा प्रमुख सन्तोष आचार्यले देवानलाई बीमाङ्क ५ लाख बराबरको एक वर्षे टर्म बीमा (जीवन बीमा) प्रदान गर्ने घोषणा गरे ।
सम्मानित हुँदै देवानले भने, "भुई मान्छेलाई यसरी सम्मान पाउँदा हौसला बढेको छ र आउने दिनमा अझै उर्जा थपिएको छ ।" कार्यक्रममा हरि कट्टेल (विराटनगर) र किरण शिवा (सुनसरी) ले कविता वाचन गरेका थिए ।साहित्यकार, समाजसेवी, सञ्चारकर्मी र विद्यार्थीहरूको उपस्थितिमा सम्पन्न कार्यक्रममा विभिन्न व्यक्तित्वहरूको उल्लेख्य सहभागिता रहेको थियो ।
