विराटनगर । विराटनगर महानगरपालिकाले वडा नम्बर १८ का सबै सामुदायिक विद्यालयका विद्यार्थीलाई न्यानो कपडा वितरण गरेको छ ।
वडा कार्यालयको ९ लाख बजेटबाट विद्यार्थीलाई न्यानो कपडा वितरण गरिएको हो ।
महानगरका मेयर नागेश कोइरालाको प्रमुख आतिथ्यतामा जनक आधारभूत विद्यालय परिसरमा आयोजित कार्यक्रममा ५ वटा विद्यालयका ९ सय २३ जना विद्यार्थीलाई न्यानो कपडा वितरण गरिएको थियो । वडाका जनक आधारभूत विद्यालय, जनता आधारभूत विद्यालय, विराट प्रावि, श्रीराम प्रावि र बिघी प्राविका ९ सय २३ जना विद्यार्थीलाई न्यानो कपडा वितरण गरिएको वडाध्यक्ष जितेन्द्र साहले जानकारी दिनुभयो ।
कार्यक्रममा मेयर कोइरालासहित उपमेयर शिल्पा निराला कार्की, निमित्त प्रमुख प्रशासकीय अधिकृत रामप्रसाद ढुंगेल, वडा नम्बर १८ का अध्यक्ष जितेन्द्रकुमार साहलगायतले सम्बन्धित विद्यालयका प्रधानाध्यापकलाई एकमुण्ठ कपडा हस्तान्तरण गरिएको थियो । प्रअमार्फत सबै विद्यार्थीलाई न्यानो कपडा वितरण गरिनेछ । जनक आधारभूतका विद्यार्थीलाई भने कार्यक्रमकै अवसरमा सोमबार नै वितरण गरिएको थियो ।
कार्यक्रमलाई सम्बोधन गर्दै मेयर कोइरालाले सामुदायिक विद्यालयको भौतिक संरचनाको विकाससँगै गुणस्तर वृद्धिमा महानगरपालिका गम्भीर रहेको बताउनुभयो। सामुदायिक विद्यालयप्रति विद्यार्थी र अभिभावकको आकर्षण बढ्दै गएको उहाँको भनाइ थियो ।
