खोटाङ । खोटाङबाट बिरामी बोकेर काठमाडौं जाँदै गरेको सुमो दुर्घटना हुँदा तीन जनाको मृत्यु भएको छ ।
बिहीबार बिहान करिब ६:३० बजे ओखलढुङ्गाको मानेभञ्ज्याङ गाउँपालिकास्थित भँडारे खोलामा ना १ ज ६४२१ नम्बरको सुमो दुर्घटनाग्रस्त अवस्थामा फेला परेको प्रहरीले जनाएको छ ।
दुर्घटनामा खोटाङको केपिलागढी गाउँपालिका-३ की ५६ वर्षीया माया देवी गुरुङ, उनका २८ वर्षीय छोरा पुजन गुरुङ र दिक्तेल रुपाकोट मझुवागढी नगरपालिकाकी ४५ वर्षीया तारा गुरुङ (माया देवीकी बहिनी) को घटनास्थलमै मृत्यु भएको जिल्ला प्रहरी कार्यालय ओखलढुङ्गाले जनाएको छ ।
बिरामी माया देवी गुरुङलाई उपचारका लागि छोरा र बहिनीले काठमाडौं लैजाँदै गरेको बुझिएको छ । सुमोमा चालकसहित चार जना सवार रहेकोमा तीन जनाको मृत्यु भएको र चालक सुनसरीको इनरुवा निवासी २२ वर्षीय अनिल पण्डित फरार रहेको जिल्ला प्रहरी कार्यालय खोटाङले जनाएको छ ।
प्रहरीका अनुसार सुमो राति नै दुर्घटना भएको हुन सक्ने आँकलन गरिएको छ । बुधबार राति करिब ११ बजे च्यास्मिटार प्रहरी बिटले रोक्न अनुरोध गर्दा समेत नरोकी सुमो तीव्र गतिमा गएको इलाका प्रहरी कार्यालय हलेसीले जनाएको छ ।
