विराटनगर । कोशी प्रदेशबाट होली मनाउने क्रममा उच्छृङ्खल गतिविधि गरेको आरोपमा एक सय ३३ जनालाई प्रहरीले नियन्त्रणमा लिएको छ।
प्रहरीले एक हजार ९९ वटा सवारीसाधनलाई पनि नियन्त्रणमा लिएको छ । होलीमा अवाञ्छित र उच्छृङ्खल गतिविधि गरेको आरोपमा प्रहरीले मोरङबाट १० महिलासहित ६६ जना, सुनसरीबाट १२ महिलासहित ४८, उदयपुरबाट १२ जना पुरुष तथा झापाबाट ७ जना नियन्त्रणमा लिएको हो ।
कोशी प्रदेशका प्रहरी प्रमुख डीआईजी राजन अधिकारीका अनुसार होली खेलेर रमाइलो गर्ने नाममा कानुनविपरीतका गतिविधिमा संलग्न भएकाहरुलाई पक्राउ गरिएको हो । पक्राउ परेकाहरुमाथि थप अनुसन्धान भइरहेको उनले बताए ।
त्यस्तै, नियम उल्लंघन गरेर चलाइएका १ हजार ९९ वटा सवारीसाधनलाई प्रहरीले नियन्त्रणमा लिएको छ । झापाबाट ४ सय २७, सुनसरीबाट ३ सय ६६, मोरङबाट २ सय ६७ र उदयपुरबाट ३९ वटा सवारीसाधन नियन्त्रणमा लिइएको जानकारी डीआईजी अधिकारीले दिए ।
उनका अनुसार नियन्त्रणमा लिइएकामध्ये सबैभन्दा धेरै २ पांग्रे सवारीसाधन छन् । प्रहरीले २ पांग्रे १ हजार २१ वटा, ३ पांग्रे ५९ र ४ पांग्रे १९ वटालाई नियन्त्रणमा लिएर दिनभर ‘होल्ड’ गरेको हो ।
नियन्त्रणका लिइएका अधिकांश सवारीसाधन चालकले मापसे (मादक पदार्थ सेवन) गरेर चलाएका थिए । ती सवारीसाधनलाई ट्राफिक नियम उल्लंघनको कसुरमा कारबाही गर्ने प्रहरीको तयारी छ ।
