विराटनगर । हरेक वर्ष मार्च महिनामा साताव्यापी रूपमा मनाइने ‘ग्लोबल मनी विक’ को तेह्रौँ संस्करण आजदेखि सुरु भएको छ ।
‘ग्लोबल मनी विक’ अन्तर्गत कुमारी बैंक मेनरोड विराटनगर शाखाले वित्तीय सचेतना कार्यक्रम आयोजना गरेको छ । विराटनगरमा रहेको विराटनगर इन्टरनेसनल कलेजमा आज(सोमबार) वित्तीय सचेतना कार्यक्रम आयोजना गरेको हो ।
उक्त कार्यक्रमको प्रशिक्षण कुमारी बैंकका प्रदेश प्रमुख मनिष श्रेष्ठ र विराटनगर शाखाका प्रमुख अंकित पाण्डेले गरेका थिए।
उक्त कार्यक्रममा १०० जना भन्दा बढी विद्यार्थीहरुको सहभागिता रहेको थियो ।
कोशी प्रदेशमा २५ वटा शाखा रहेकोे कुमारी बैंकले जनाएको छ।
यही चैत १० गतेसम्म सञ्चालन हुने कार्यक्रमअन्तर्गत राष्ट्र बैङ्कको संयोजनमा मुलुकभर वित्तीय सचेतना अभिवृद्धिमा सहयोग पुग्ने किसिमका चेतनामूलक कार्यक्रम सञ्चालन हुने जनाइएको छ । ‘ग्लोबल मनी विक’ मूलतः किशोर/किशोरी तथा युवा/युवतीमा वित्तीय शिक्षाको महत्व बारे जागरण ल्याउने उद्देश्यका साथ विश्वव्यापी रूपमा यो अभियान थालिएको हो ।
अर्गनाइजेसन फर इकोनोमिक कोअप्रेसन एन्ड डेभलपमेन्ट (ओइसिडी)को संयोजनमा सन् २०१२ देखि प्रत्येक वर्ष विश्वव्यापी रूपमा यो अभियान सञ्चालन हुँदै आएको छ । राष्ट्र बैङ्कको संयोजनमा सन् २०१३ देखि नेपालमा पनि यो अभियान सञ्चालन गरिँदै आइएको छ । यस अभियानबाट हालसम्म विश्वका एक सय ७६ भन्दा बढी मुलकका करिब छ करोड बालबालिका, किशोरकिशोरी र युवाहरू लाभान्वित भएको ओइसिडीले जनाएको छ । अभियानको स्थायी नारा ‘सिक, बचाउ, कमाउ’ (लर्न, सेभ, अर्न) रहेको छ ।
