विराटनगर । नेकपा एमालेको तत्कालिन संगठन कमिटिको कारवाहीमा परेका पूर्व नगर सहसचिव नवराज नेपाल र ३ नम्बर वडा अध्यक्ष लालमणी भट्टराई फुकुवा भएका छन् । गत जेठ ३१ गते महानगरपालिकाका अध्यक्ष सागर थापासहित उपसचिव नेपाल र वडा कमिटि अध्यक्ष भट्टराई कारवाहीमा परेका थिए ।
त्यसबेला महानगर अध्यक्ष थापालाई दुई महिना, उपसचिव नेपाललाई चार महिना र वडा कमिटि अध्यक्ष भट्टराईलाई ६ महिना निलम्बन कारवाही गरिएको थियो । मानगढ खानेपानी आयोजनामा पार्टीका लाइन अनुसार राम घिमिरेको विरुद्धमा लालमणी भट्टराईलाई अध्यक्ष उठाएर उनलाई सहयोग गरेको आरोपमा दुई महिना निलम्बनमा परेका थापा अहिले जिल्लाको उपाध्यक्षमा निर्वाचित भईसकेका छन् ।
नेकपा एमाले १० औं जिल्ला अधिवेशनबाट नयाँ समिति आएपछि नेपाल र भट्टराईको परीक्षण अवधी सकिनु अगावै कारवाही फुकुवा गरेर अब चुन्न र चुनिन पाउने अधिकारका लागि बाटो खोलिएको छ । नेपाल र भट्टराईले कारवाही अवधी गुजारेर परीक्षण गर्ने अवधी आगामी चैत मसान्तसम्मलाई तोकिएको थियो ।
जिल्ला अधिवेशनमा कारवाही गर्ने पक्ष सबै परास्त गर्दै कारवाही भोग्ने पक्षले निर्वाचन जीतेको थियो । निर्वाचित कमिटिको सचिवालयको बैठकले परीक्षण अवधी केहि बाँकी रहँदै चुन्न र चुनिन पाउने अधिकार खुल्ला गरेपछि अब स्थानीय तहको अधिवेशनका लागि नेपाल र भट्टराई खुल्ला भएका हुन् । नेकपा एमाले मोरङका उपाध्यक्ष सागर थापाले प्रदेश कमिटिसँग सोधपुछ गर्दा त्यसको अधिकार जिल्लालाई नै रहेको निर्देशनपछि परीक्षण अवधी हटाइएको जानकारी दिएका छन् ।
‘सम्बन्धित जिल्लाले गर्नसक्ने भन्ने भएपछि परीक्षण अवधी थप्ने की हटाउने विषय टुङ्गाइएको हो’ उपाध्यक्ष थापाले भने–यसमा प्रदेशको निर्देशन बमोजिम गरिएको हो । जिल्ला सचिवालय बैठकले केन्द्रको अभियान र अब स्थानीय तहहरुको अधिवेशनको विषयमा समेत छलफलपछि निर्णय लिइएको छ ।
