विराटनगर । औषधी व्यवस्था विभागले छ समूहका एन्टिबायोटिक औषधी अस्पतालका फार्मेसीबाट मात्रै बिक्री गर्न पाइने गरी राखेको प्रावधान हटाउन माग गर्दै स्वास्थ्यमन्त्री प्रदिप पौडेलसँग व्यवसायीले माग गरेका छन् ।
विभागले गत फागुन २५ गते गरेको निर्णय अनुसार रिजर्भ वर्गमा राखिएका औषधी खुद्रा फार्मेसीबाट बिक्री गर्न प्रतिबन्ध लागेको छ ।
यसरी बिक्री प्रतिबन्ध लगाइएका रिजर्भ एन्टिबायोटिक्स सबै औषधी पसलबाट बिक्री खुल्ला गर्न पाउनु पर्ने माग गर्दै औषधी व्यवसायी संघ मोरङले मन्त्री पौडेलको ध्यानाकर्षण गराएको हो । पोलिम्याक्सिन बी, मेरोमेनेम, पिप्रासिलिन भ्यान्कोमाइसिन, कोलिस्टिन र लिनिजोलिड चिकित्सकको सिफारिसमा अस्पतालका फार्मेसीबाट मात्रै बिक्री गर्न पाउने निर्णय गरिएको थियो ।
विभागले एन्टिबायोटिक औषधी प्रयोगको असरबाट हुने प्रतिजैविक प्रतिरोधको अवस्था नियन्त्रण गर्नका लागि गरेको निर्णय सच्याउनुपर्ने व्यवसायीले मन्त्रीसँग माग राखेका हुन् ।
नेपाल औषधी व्यवसायी संघ मोरङले यसलाई सबै फार्मेसीबाट बिक्री खुल्ला नगर्दा निजी लगानीका व्यवसायीहरु धराशायी हुने भन्दै मन्त्री पौडेलको ध्यानाकर्षण गराएको हो । कोशी अस्पतालले संचालनमा ल्याएको ‘निःसन्तान क्लिनिक’ को उद्घाटन तथा अस्पताल निरीक्षणका क्रममा विराटनगर आउनु भएका मन्त्री पौडेललाई संघका अध्यक्ष देशबन्धु ढकालको नेतृत्वको व्यवसायीको टोलिले ज्ञापनपत्र समेत बुझाएको थियो ।
विभागको निर्णयले अस्पताल बाहिरका फार्मेसीहरु विस्थापित हुनुपर्ने अवस्था आउने अध्यक्ष ढकालको भनाई छ । चिकित्सकले लेखिदिएका औषधीहरु अस्पतालको फार्मेसीमा मात्रै पाईने भएपछि बाँकी औषधी समेत सेवाग्राहीले त्यहिंबाट खरिद गर्नसक्ने संभावना हुने ढकालको भनाई छ ।
सबै औषधी अस्पतालका फार्मेसीबाट खरिद गर्ने गर्दा निजी लगानी संकटमा पर्नसक्नेतर्फ ध्यान दिन मन्त्री पौडेलसँग आग्रह गरिएको छ । मन्त्री पौडेलले यसको अवस्था अध्ययन गरेर मात्रै जवाफ दिने बताउनु भएको थियो ।
