इन्दु साह
विराटनगर । चालकले मादक पदार्थ सेवन गरेर सवारी चलाएका घटना प्रशस्त सुनिदै आएका छन् । मादक पदार्थ सेवन गरेर सवारी चलाउँदा हुने दुर्घटनाको जोखिम सामान्य हुँदैन । तर, चालकको अब मादक पदार्थ मात्रै नभई लागुऔषध सेवन गरे नगरको समेत परीक्षण हुने थालेको छ । जसमा ५५ जनाको परीक्षण गर्दा ११ जना भने पोजेटिभ भेटिएका छन् ।
जिल्ला ट्राफिक प्रहरी कार्यालय मोरङको बुधबार बेलबारी नगरपालिका वडा नं. १ स्थित ट्राफिक प्रहरी पोष्ट बेलबारी अगाडिको पूर्व–पश्चिम राजमार्ग सडक खण्डमा चालक तथा सह–चालकहरुको स्वास्थ्य परीक्षण कार्यक्रम गरेको छ । त्यस क्रमा ५५ जनाको परीक्षण गर्दा ११ जनामा पोजेटिभ भेटिएको हो ।
कोशी प्रदेश प्रहरी अस्पताल इनरुवा सुनसरी र विराट आँखा अस्पताल विराटनगरको सहकार्यमा आयोजित स्वास्थ्य शिविर कार्यक्रममा ११५ जना चालक, सह–चालक तथा स्थानीय नागरिकहरुको रक्तचाप (ब्लड प्रेसर) जाँच, आँखा परीक्षण गरिनुका साथै निःशुल्क औषधी वितरण गरिएको थियो।
सवारी साधन अनुसार १८ जना ट्रक चालकमध्ये २ जना, १३ जना टिफर चालकमध्ये ४ जना, ११ जना यात्रुवाहक बस चालकमध्ये ४ जना र ३ जना ट्याक्टर चालकमध्ये १ जनामा लागुपदार्थ सेवन पुष्टि भएको ट्राफिक प्रहरी कार्यालयका प्रमुख राजन लम्सालले जानकारी दिएका छन् ।
स्कुल बस, पिकअप, म्याजिक र कारका चालकहरुमा भने लागुपदार्थ सेवनको प्रमाण फेला परेन । जिल्ला ट्राफिक प्रहरी कार्यालय मोरङका प्रमुखका अनुसार, सडक दुर्घटना न्यूनीकरण गर्न र सुरक्षित यात्रा सुनिश्चित गर्न यस्ता कार्यक्रमहरुले सहायता हुनेछ ।
