विराटनगर । विराट नर्सिङहोम र नेपाल इन्भेस्टमेन्ट मेघा बैंक (एनआइएमबी) बीच सहयोग आदानप्रदान गर्ने सहकार्यका लागि सम्झौता गरिएको छ । दुवै पक्षबीच शुक्रबार विराटनगरमा यस्तो सम्झौता सम्पन्न भएको हो ।सम्झौताअनुसार विराट नर्सिङ होमले स्वास्थ्य सेवा उपलब्ध गराउने छ भने एनआइएमबीले बैंकिङ सुविधाहरुमा सहुलियत दिने छ ।
विराट नर्सिङ होमले उक्त बैंकका कर्मचारीहरु एवं ग्राहकहरुको स्वास्थ्य उपचारमा विशेष छुट उपलब्ध गराउने सम्झौता भएको छ । यसैगरी, बैंकले विभिन्न बैंकिङ प्रक्रियाहरुमा सहुलियत दिने सहमति गरिएको छ ।
यसैगरी दुवै संस्थाको प्रवर्द्धनमा एकअर्काले सहयोग पुर्याउने समझदारी पनि गरिएको जनाइएको छ ।सम्झौतापत्रमा विराट कलेजका तर्फबाट प्रशासन प्रमुख पदम बिनादी र प्रशासन अधिकृत साजनकुमार पासवानले हस्ताक्षर गरेका छन् । यस्तै, बैंकका तर्फबाट बैंकको विराटनगर शाखाका प्रमुख कृष्ण गोविन्द पौडेल र कोशी प्रदेश रिलेसनसिप प्रबन्धक नवनित राज प्रधानले हस्ताक्षर गरेका छन् ।
यसअघि विराट मेडिकल कलेज टिचिङ हस्पिटल र एनआइएमबी बीच पनि सहकार्यको सम्झौता भइसकेको छ । स्वास्थ्य सेवा उपलब्ध गराउने तथा बैंकिङ सुविधाहरुमा सहुलियत दिनेलिने विषयमा सम्झौता भएको बैंकका प्रतिनिधि श्रेष्ठले जानकारी दिए ।
