विराटनगर । झापाको मेचिनगर नगरपालिका ६ स्थित भन्सार कार्यालयबाट ‘एयर पेस्तोल’ र ‘मेटल बुलेट’सहित एक भारतीय नागरिक पक्राउ परेका छन् ।
भारत सिलिगुडीका २६ प्रतिक अग्रवाल मंगलबार बिहान हतियारसहित सशस्त्र प्रहरी बल नेपाल प्रस्तावित सीमा सुरक्षा गुल्म र इलाका प्रहरी कार्यालय काँकडभिट्टाबाट खटिएको संयुक्त टोलीले बिहान ८ः५० बजेतिर पक्राउ गरेको हो । सुरक्षाकर्मीको संयुक्त टोलीले सवारीसाधन तथा यात्रु चेकजाँच गर्ने क्रममा डब्लुबी ७४ एजे ०४०० नम्बरको स्कुटर रोकेको थियो ।
भारतीय नम्बर प्लेटको स्कुटर चेकजाँच गर्ने क्रममा डिकीभित्र लुकाएर राखिएको अवस्थामा अवैध हतियार ‘एयर पेस्तोल’ र अग्रवालले बोकेको झोलाभित्र पेस्तोलमा प्रयोग हुने १८ थान ‘मेटल बुलेट’ बरामद भएको प्रहरीले जनाएको छ । अग्रवाललाई नियन्त्रणमा लिएर थप अनुसन्धान अघि बढाइएको कोशी प्रदेश प्रहरी कार्यालय विराटनगरले जनाएको छ ।
