विराटनगर । रसुवाको गोसाँईकुण्डमा नुहाउने क्रममा विराटनगर र बेलबारीका दुईजना युवाको डुबेर मृत्यु भएको छ । गोसाँईकुण्ड नुहाउने क्रममा विराटनगर–३ ढाटका सुजन ढकाल र बेलबारी–११ का मनोज न्यौपानेको डुबेर मृत्यु भएको हो ।
जिल्ला प्रहरी कार्यालय रसुवाका प्रहरी नायव उपरीक्षक हेम बहादुर शाहीका अनुसार उनीहरु आइतबार नुहाउने क्रममा डुबेका थिए । त्यसपछि प्रहरीले खोजतलासपछि सोमबार शव फेला पारेको हो । शाहीका अनुसार अहिले घटनास्थल वस्तुस्थिति मुचुल्का तयार पार्ने काम भईरहेको छ ।
त्यसपछि गोसाँईकुण्ड गाउँपालिका–५ मा बाट लासहरुलाई धुन्चे ल्याइनेछ । डिएसपी शाहीका अनुसार अहिले मृतकका परिवारसँग सम्पर्क गरेर लास बुझ्नका लागि बोलाइएको छ ।
मृतक ढकाल र न्यौपानेसहित १३ जना युवाहरु त्यहाँ पुगेका थिए । गोसाँईकुण्डमा नुहाउने क्रममा उनीहरु डुबेपछि बाँकी साथीहरु समेत त्यहिं रहेका छन् । घटना बारे थप अनुसन्धान प्रहरीले गर्ने जानकारी दिइएको छ ।
