विराटनगर । प्रत्येक वर्ष भाद्र कृष्ण प्रतिपदादेखि अष्टमीसम्म ८ दिन मनाइने परम्परागत सांस्कृतिक पर्व ‘गाईजात्रा’ आइतबार (आज) विराटनगर लगायत देशभर विभिन्न कार्यक्रमको आयोजना गरेर मनाइएको छ ।
मृतात्माको शान्तिको कामना गर्दै विराटनगरमा रहेका नेवारी समुदायले विभिन्न झाँकी प्रदर्शन सहित गाईजात्रा विशेष मनाएका छन् । गाईजात्रा पर्वका अवसरमा विराटनगरमा रहेका नेवारी समुदायले विभिन्न भेषभुषामा सजिएर जात्रा निकालिएका छन् ।
विराटनगरको झिःपुचबाट सुरु भएको जात्रा संसारीमाई मन्दिर हुँदै मेनरोड, तीनपैनीको बाटो भएर पोखरियास्थित राधाकृष्ण मन्दिरमा पुगेर समापन भएको छ । नेपालका विभिन्न भागमा विविध विधि र शैलीमा मनाइने गाईजात्रा पर्व विशेषगरी नेवार समुदायले दिवंगत पितृहरूको सम्मान तथा आत्मा–मुक्तिका लागि मनाउने गर्दछन् ।
एक वर्षभित्र दिवंगत भएका आफन्तको सम्झनामा गाई वा मानिसलाई गाईका रूपमा सिँगारी आ–आफ्ना क्षेत्रमा परिक्रमा गराउने तथा उनीहरूलाई श्रद्धालुद्वारा दुध, फलफूल, रोटी, चिउरा, दहीका साथै अन्न र द्रव्य दान गरिन्छ ।
