विराटनगर । मोरङको बुढीगंगा गाउँपालिका ४ स्थित नेमुवा मोड नजिक भएको सवारी दुर्घटनामा एक बालकको ज्यान गएको छ । दुर्घटनामा ८ वर्षीय शम्भु पौडेलको मृत्यु भएको हो । इलाका प्रहरी कार्यालय नेमुवाका अनुसार बिहान करिब ४ बजे उत्तरतर्फ जाँदै गरेको सवारीले ठक्कर दिएको हो । प्रदेश.१–०२–००२ च ४६६५ नम्बरको पिकअप गाडीले बाटो क्रस गर्ने क्रममा विद्यालयबाट घर फर्कदै गरेका ५ वर्षीय पौडेललाई ठक्कर दिएको थियो । ठक्करबाट गम्भीर घाइते भएका बालकलाई तत्काल विराट टिचिङ अस्पताल पुर्याइए पनि चिकित्सकले उनलाई मृत घोषणा गरे ।
दुर्घटनामा संलग्न गाडी चालक सुनसरी दुहबी नगरपालिका ११ बस्ने २७ वर्षीय दीप नारायण रिजाललाई मोरङ प्रहरीले नियन्त्रणमा लिएको छ । चालकविरुद्ध आवश्यक कानुनी प्रक्रिया अगाडि बढाइएको प्रहरीले जनाएको छ । जिल्ला प्रहरी कार्यालय मोरङले घटनाबारे थप अनुसन्धान भइरहेको जनाएको छ। पीडित बालक स्मृति बोर्डिङ स्कुलको युकेजिमा अध्ययनरत थिए । विद्यालय सकाएर घर फर्कने क्रममा उनी दुर्घटनामा परेका हुन् ।
