विराटनगर । तेस्रो पटक टी–२० विश्वकप क्रिकेट खेलिरहेको नेपाली टोलीप्रति हौसला दिन नेपालमा प्रधानमन्त्रीदेखि प्रतिनिधिसभा सदस्य निर्वाचनका उम्मेदवारसम्म सक्रिय भएका छन् । प्रधानमन्त्री सुशीला कार्कीले नेपाली क्रिकेट टोलिलाई शुभकामना दिदैं खुशी व्यक्त गरेकी छिन् ।
‘मुम्बईको वानखेडे स्टेडियममा हाम्रो राष्ट्रिय धुन गुञ्जिनेछ र त्यो विश्वले सुन्नेछ,’ प्रधानमन्त्री कार्कीले लेखेकी छन्, ‘कप्तान रोहित पौडेलको टोलीले देखाउनेछ(नेपालको आत्मविश्वास, एकता र सामूहिकताको बेजोड प्रस्तुति ।’
तेस्रोपटक विश्वकप खेलिरहेको नेपालसँग संसारभर फैलिएका प्रशंसकको साथ र विगतमा गरेका चमत्कार तथा सफलताको आड रहेको प्रधानमन्त्री कार्कीले बताएकी छन् । ‘इंग्ल्यान्डसँगको आजको ऐतिहासिक भेटअघि सिंगो राष्ट्रका तर्फबाट शुभकामना । विजयी भवः, अनि धेरै माया पनि,’ प्रधानमन्त्री कार्कीले लेखेकी छन् ।
विश्वकपअन्तर्गत नेपालले आज आफ्नो पहिलो खेल मुम्बईको वानखेडे क्रिकेट रंगशालामा दिउँसो ३ः१५ बजेबाट इंग्ल्यान्डसँग खेल्नेछ । यसैगरी नेपाली क्रिकेट टोलिलाई नेकपा एमालेका अध्यक्ष केपी शर्मा ओलीसहित प्रतिनिधिसमा सदस्यको उम्मेदवार बनेका उम्मेदवार तथा राजनीतिक दलका नेताहरुले समेत शुभकामना दिएका छन् ।
