विराटनगर । मोरङको बूढीगंगा गाउँपालिकामा रहेको आरती स्ट्रिप्स नामक उद्योगका सिनियर म्यानेजर सुतेकै ठाँउमा मृत अवस्थामा फेला परेका छन् ।
बूढीगंगा गाउँपालिका–१ स्थित उद्योगकै क्वाटरमा बस्दै आएका भारतको गाजियावाद घर भएका अन्दाजी ५५ वर्षीय राजीव शर्मा आइतबार बिहान ११ः१५ बजेतिर सुतेकै ठाउँमा मृत भेटिएको जिल्ला प्रहरी कार्यलय मोरङले जनाएको छ । अघिल्लो दिन बेलुका खाना खाएर सुतेका शर्मा भोलिपल्ट अबेरसम्म नउठेपछि साथीले कोठामा गएर हेर्दा घोप्टो परेर मृत्यु भएको अवस्थामा देखेपछि प्रहरीलाई खबर गरेका थिए ।
प्रहरी पुग्दा सुतेकै ओछ्यानमा घोप्टो परेको अवस्थामा शर्मा मृत फेला परेका थिए । घटनाको प्रकृति हेर्दा कुनै पनि शंकास्पद नदेखिएको मोरङ प्रहरीका प्रवक्ता डीएसपी हरिनन्दन चौधरीले जानकारी दिए । उनको मृत्युको कारण पनि खुल्न सकेको छैन । शवलाई पोस्टमार्टमका लागि विराटनगरको कोशी अस्पताल पठाएर घटनाको थप अनुसन्धान सुरु गरिएको मोरङ प्रहरीले जनाएको छ ।
