विराटनगर । विगत लामो समयदेखी विराटनगरको महेन्द्र चौकमा राजा महेन्द्रको सालिक राख्ने भन्ने कुरा बेलाबेलामा उठ्दै आएको थियो । तर कानुनी प्रावधानका कारण स्वतस्फुर्त रुपमा व्यक्तिगत र सस्थागत रुपमा त्यसै राख्न नपाइने भएका कारण त्यतिकै स्थगित रहेको थियो ।
महेन्द्र चौकमा शालिक राख्ने भनेर विभिन्न समिति तथा उपसमिति पनि बने तर त्यसलाई आधिकारिक रुपमा राख्ने आट भने गरेनन् । २०६२/६३ सालको जनआन्दोलनमा महेन्द्र चौकका सालिक तोडफोड गरि फालियो । त्यसपछि महेन्द्र चौकमा विना महेन्द्रको सालिक त्यतिकै रहिआएको छ । राजावदाीहरुले हाल राजाको तस्वीर अंकित पोष्टर टासेका छन् । आन्दोलनपछि त्यसलाई जनआन्दोलन नामाकरण पनि गरियो । कतिपयले जनआन्दोलन भन्दै आएका छन् भने कतिपयले महेन्द्र चौक नै भन्छन् ।विराटनगरमा रहेको सनातन युवा मंचले सालिक स्थापना गर्ने घोषणा गरेको छ । मंचका अध्यक्ष नवराज ढकालको समुहले बिहीबार मात्रै विराटनगरमा पत्रकार सम्मेलन गरेर आगामी जेठ ३० गते स्थापना गरिने जनाएका छन् । उक्त दिन पूर्व राजा महेन्द्रको जन्मोउत्सव भएकाले सोही दिन स्थापना गरिने ढकालले जानकारी दिएका छन् ।
सालिक निर्माणका लागि १० लाख रुपैयाँ खर्च हुने भएका कारण विभिन्न संघ सस्था तथा आमसर्वसाधरणहरुबाट आर्थिक सहयोग जुटाई सालिक बनाउने योजना बनाईएको सनातन युवा मंचले जनाएको छ । तर यता राज्यसँग स्वीकृति नलिकन ऐन र कानुन विपरित पूर्वराजा महेन्द्र शाहको सालिक निर्माण गर्न नपाईने मोरङका प्रमुख जिल्ला अधिकारी युवराज कट्टेलले बताए । उनले भने, ‘‘अहिले सम्म सालिक राख्ने भनेर हामीलाई कुनै पनि आधिकारिक जानकारी आएको छैन’’। यस्तो विषयमा राज्यसँग अनुमति लिनुपर्ने भएकाले हामीसँग समन्वय नगरि यसरी राख्न पाईनेछैन ।’’
