जनकपुरधाम । धनुषामा दुई अर्ब लगानीमा पाँचतारे होटल निर्माण हुने भएको छ । मिथिला होस्पिटालिटी प्रालिको लगानीमा जनकपुरधाममा पहिलोपटक पाँचतारे होटल निर्माण हुन लागेको हो ।
सोमबार मधेस प्रदेशका मुख्यमन्त्री कृष्णप्रसाद यादव र प्रतिनिधिसभा सदस्य मनिष झाले संयुक्त रूपमा होटल निर्माणको लागि शिलान्यास गरेका हुन् ।
मिथिला होस्पिटालिटीका अध्यक्ष रामेश्वर साहले सवा दुई बिघा क्षेत्रफलमा लक्ष्मीनियाँ गाउँपालिका–१ मा होटल निर्माण हुन लागेको जानकारी दिए । उनका अनुसार भाटभटेनी सुपर मार्केटनजिक बन्न लागेको यस होटलमा १२४ वटा सुविधासम्पन्न कोठा रहनेछन् । तीन वर्षभित्र होटल निर्माण सम्पन्न हुने लक्ष्य राखिएको छ । उद्घाटनमा मिथिला होस्पिटालिटीका अध्यक्ष साहले जनकपुरधामलाई पर्यटकीय हब बनाउन लगानी गर्न लागेको बताए ।
