विराटनगर। सुनसरीमा दुई समुदायबीच भएको हिंसात्मक झडपपछि त्यसको प्रभाव अन्य जिल्लामा समेत फैलिन थालेपछि जिल्ला प्रशासन कार्यालय मोरङले सर्वपक्षीय बैठक बोलाएको छ ।
मोरङ उद्योग व्यापार संघको सभाहलमा जारी बैठकमा जिल्लास्थित राजनीतिक दल, सुरक्षा निकाय, स्थानीय तहका प्रतिनिधि तथा सरोकारवालाको सहभागिता रहेको छ । सुनसरी घटनापछि विभिन्न जिल्लामा प्रदर्शन विस्तार भइरहेका बेला उत्पन्न परिस्थितिबारे समीक्षा गर्दै शान्ति सुरक्षा, सामाजिक सद्भाव कायम राख्ने उपाय र सम्भावित सुरक्षा व्यवस्थाबारे बैठकमा छलफल भइरहेको जनाइएको छ । प्रशासनले जिल्लामा शान्ति, सामाजिक सद्भाव र कानुन व्यवस्था कायम राख्न सबै पक्षसँग संयमता अपनाउन तथा अफवाहमा विश्वास नगर्न आग्रह गरेको छ ।
