विराटनगर । राधाकृष्ण रथयात्रालाई लक्षित गर्दै स्थानीय प्रशासनले एकिकृत सुरक्षा योजना तयार पारेको छ । मोरङका सहायक प्रमुख जिल्ला अधिकारी सरोजराज कोइरालाका अनुसार यो योजना अनुसार एक हजार ४०० प्रहरी राधाकृष्ण रथयात्राका लागि परिचालन गरिनेछ ।
जसमा नेपाल प्रहरीका एक हजार र सशस्त्र प्रहरीका चार सयजना रथयात्रा सुरक्षा लक्षित परिचालित हुनेछन् । रथ परिक्रममा क्रममा ४४ विश्रामस्थल, रथको वरिपरी अनि रथ हिड्ने स्थानमा सुरक्षाकर्मी खटिनेछन् । यस बाहेक २० स्थानमा आपतकालिन सुरक्षा स्ट्याण्डिङ्ग स्थापना गरिएको छ । यसको पेरीफेरी रहेर सातवटा सिआरभी भ्यानबाट पेट्रोलिङ्ग हुने सहायक प्रमुख जिल्ला अधिकारी कोइरालाले जानकारी दिनुभयो ।
यस पटक रथयात्रामा महिलामाथि हुनसक्ने हिंसा तथा चोरीमा संलग्न संदिग्धलाई नियन्त्रण गर्न दुईवटा पक्राउ टोलि परिचालन गरिएको छ । राधाकृष्ण रथायात्रको अवधीभरका सबै गतिविधि भिडियो रेकर्ड गर्नका लागि २५ स्थानमा सिसी टिभी थप गरिएको छ । त्यस बाहेक ३ वटा ड्रोन क्यामरा समेत परिचालन गरिने भएको छ ।
यस पटक अर्को महत्वपूर्ण कार्य भनेको प्रहरीको बडीमै क्यामरा राखिएको छ । जसका कारण प्रहरीले आफ्ना वरिपरिका गतिविधि रेकर्ड गरिरहेका हुनेछन् । स्थानीय प्रशासनले रथयात्रामा हुने गतिविधिलाई रथयात्रा सकेपछि समेत नियालेर पछि व्यक्तिको विवरण संकलन र प्रोफालिङ्ग गर्ने दावी गरिएको छ ।
