विराटनगर । सुनसरीको दुहबीमा प्रहरीले एम्बुलेन्सबाट ५ सय ७४ किलो ८ सय ७३ ग्राम गाँजा बरामद गरेको छ। जिल्ला प्रहरी कार्यालय सुनसरीका अनुसार असोज २ गते राति करिब १२ः३० बजे कोशी राजमार्गमा नम्बर नखुलेको एम्बुलेन्समा इटहरीबाट विराटनगरतर्फ लागूऔषध गाँजा ओसारपसार भइरहेको भन्ने सूचनाका आधारमा प्रहरीले खोजतलास सुरु गरेको थियो।
इलाका प्रहरी कार्यालय दुहबी र प्रहरी चौकी दुहबीबाट खटिएको प्रहरी टोलीले दुहबी नगरपालिका–६, बुढीखोलाको किनारमा एम्बुलेन्स फेला पारेको हो। चेकजाँचका क्रममा एम्बुलेन्स बेवारिसे अवस्थामा छाडिएको भेटिएको प्रहरीले जनाएको छ।एम्बुलेन्सभित्र लागूऔषध गाँजाजस्तो देखिने पदार्थ ५ सय ७४ किलो ८ सय ७३ ग्राम बरामद गरिएको जिल्ला प्रहरी कार्यालय सुनसरीले जनाएको छ।
प्रहरीले गाँजा र एम्बुलेन्स नियन्त्रणमा लिएर थप अनुसन्धान अघि बढाएको छ। घटनामा संलग्न व्यक्तिहरूको पहिचान तथा खोजी भइरहेको प्रहरीले जनाएको छ।
