बाराको गढीमाई नगरपालिकामा भएको मोटरसाइकल दुर्घटनामा दुई जनाको मृत्यु भएको छ । अन्य दुई जना घाइते भएका छन् । पूर्व पश्चिम राजमार्ग अन्तर्गत गढीमाई नगरपालिका १६ मा गएराति ना २८ प ६४९४ र ना १८ प ६१३ नम्बरका मोटरसाइकल आपसमा ठोक्किदा रौतहटको चन्द्रपुर नगरपालीका १ का ३५ वर्षीय नेत्र थापा र वीरगन्ज उपमहानगरपालिका १६ का २५ वर्षीय सागर महतको मृत्यु भएको हो ।
दुवै मोटरसाइकल चालकको घटनास्थलमै मृत्यु भएको मध्य क्षेत्रीय ट्राफिक प्रहरी कार्यालय पथलैयाका प्रमुख उमेश रन्जीतकारले जानकारी दिनुभयो ।
दुर्घटनामा मोटरसाइकलको पछाडी सवार थापा की ३० वर्षीया श्रीमती दुर्गा र महोत्तरीका ३५ वर्षीय कुलदीप सिंह दनुवार घाइते भएका छन् । थापालाई उपचारको लागि ललितपुरको बी एण्ड बी अस्पताल ल्याईएको छ । दनुवारको नेशनल मेडिकल कलेज वीरगञ्जमा लगिएको छ ।
