दमक । बिप्लवसम्बद्ध नेकपा माओवादीले झापाको दमकस्थित मालपोत कार्यालयका अधिकृत होमनाथ सेडाईलाई कालोमोसो दलेका छन् ।
सोमवार दिउँसो माओवादी झापाका सेक्रेटरी बिवस किरातीको नेतृत्वमा गएको २० जनाको टोलीले सेडाईलाई कार्यकक्षमा कालोमोसो दलेका हुन् । राजश्व अनियमितता गर्ने गरेको, किर्ते जालझेल गरी जग्गा पास गर्ने गरेको, बिचौलियासँग मिलेर घुसखाने परिपाटीको बिकास गरेको, तल देखि माथिसम्म मिलेर कमिसनमा बिकेको लगायतका आरोप लगाउँदै उनीहरुले कालोमोसो दलेको बताएका छन् ।
अधिकृत सेडाईले जनतालाई अनावश्यक दुःख दिने गरेका कारण कारवाही गर्न बाध्य भएको बिप्लव सम्बद्ध एक नेताले बताएका छन् । उनका अनुसार जनकारवाहीलाई तिब्र रुपमा अगाडि बढाउने बताइन्छ । जिल्लाका भ्रष्ट कर्मचारीलाई कारवाही गर्ने बिप्लव माओवादीको योजना नै रहेको बताइएको छ ।
मेची उपव्यूरो इन्चार्ज राजेन्द्र कार्कीले दिएको जानकारी अनुसार आर्थिक प्रलोभनमा परी ऐलानी जमिन व्यक्तिको नाममा पास गर्ने, मरेका व्यक्तिको नाममा रहेको जमिन किर्ते गरी अन्य व्यक्तिको नाममा राखी सर्वसाधारणलाई हैरानी गर्नेे र सार्वजनिक जग्गा व्यक्तिको नाममा गरेर राज्यलाई क्षति पुयाउने काम गरेकाले अधिकृत सेडाईलाई कारवार्ही गरेको हो ।
