विराटनगर। विराटनगरमा ६० करोड लगानीमा नयाँ सामूहिक आवास निर्माण गरिने भएको छ । विराटनगर महानगरपालिका ७ स्थित सरस्वती टोलमा २२ कट्ठा जमिनमा सामूहिक आवासको निर्माण सुरु गरिएको हो । इष्टर्न सिटी अपार्टमेन्टपछि नयाँ सामूहिक आवास निर्माण हुने भएको छ ।
सीई ग्रुपले विराटनगरका युवा उद्योगी सुरेश राठीलाई सुरुमा स्थानीय विषयका कुरा मिलाउन साझेदार बनाएको थियो । तर, अहिले राठीको त्यसमा कुनै साझेदारी वा संलग्नता नरहेको उनले बताए । सुरुसुरुमा लोकल ईस्यू मिलाउन मलाई नि सहयोग मागेको हो, अहिले निर्माणको काम थालिएपनि म छैन, राठीले भन्नुभयो–विराटनगरमा एउटा नयाँ प्रोजेक्ट भित्रिएका छ । सीईले सामूहिक आवास निर्माण गर्न लागेको जग्गा राठीले नै बिक्री गरेका हुन् ।
३० महिना भित्रमा २७ वटा एकल आवासीय भिल्ला बनाईसक्ने लक्ष्य राखिएको छ । योजना प्रमुख एवं इन्जिनियर विमल भट्टराईका अनुसार आवासीय भिल्ला निर्माणसँगै ग्राहकलाई हस्तान्तरण गरिने छ । सामूहिक आवासमा ए, बी र सी गरी ३ प्रकारका घर हुनेछन् ।
प्रत्येक घरको बिल्ट अप एरिया २ हजार १ सय वर्गफिट हुनेछ। सबै घर साढे दुई तले हुनेछन्। यस्ता घरहरूले ९ धुर जमिन ओगट्नेछन् । यस प्रकारका घरको मूल्य २ करोड २० लाखबाट सुरु हुनेछ। त्यस्तै टाइप बी अन्तर्गत ५ वटा घरको निर्माण गरिनेछ। प्रत्येक घरको बिल्टअप एरिया २ हजार ३ सय वर्गफिट हुनेछ । यी घर पनि साढे दुई तले नै हुनेछन्। टाइप बी अन्तर्गतका घरले ९ देखि १३ धुर जमिन ओगट्नेछन्।
टाइप ए र बी अन्तर्गतका घरमा ४ वटा बेडरुम हुनेछन्। एक बेडरुम मात्र अट्याच बाथरुमयुक्त हुनेछ। बाँकी ३ बेडरुमका लागि २ वटा कमन बाथरुमको निर्माण गरिनेछ। दुबै प्रकारका घरमा छुट्टै पूजा कोठा र लिभिङ कम डाइनिङ रुमको व्यवस्था हुने दावी गरिएको छ । सबैभन्दा माथिल्लो तलाको कोठा विविध उद्देश्यका लागि प्रयोग गर्न सकिनेछ। सबै घरमा वास्तु मिलाउन हरसम्भव प्रयास गरिएको छ । इन्जिनियर समेत रहेका भट्टराईका अनुसार घरभित्रको टाइल्स, मार्बल्स र ग्रेनाइडको कामदेखि रङ रोगनसम्म सबै कम्पनीले नै गरिदिनेछ।
टाइप सीका घरलाई सीडी नामकरण गरिएको छ। यसअन्तर्गतका घरहरू सीई ग्रुपले ग्राहकको डिजाइनअनुसार बनाइदिने भएकाले कस्टमर्स डिजाइन (सीडी) भनिएको हो।
यस्ता घर २ वटा हुनेछन्। यसअन्तर्गत कति जमिनमा कस्तो प्रकारको घर भन्ने निर्णय ग्राहककै हुनेछ। घर खरिद गर्ने सबै ग्राहकले मालपोत कार्यालयबाट जारी गरिने जग्गाधनी प्रमाण पुर्जा (लालपुर्जा) पनि पाउनेछन्।
इन्जिनियर भट्टराईले टाइप ए र बी अन्तर्गतका घर खरिद गर्नेले पहिला ३० लाख रुपैयाँ एडभान्स दिएर प्रत्येक ३ महिनामा ९ किस्ता गरेर रकम तिर्नसक्नेछन् । यसबाहेक सामूहिक आवासमा निर्माण गर्न लागिएको सामुदायिक भवन र यसको कोषका लागि १ लाख रुपैयाँ छुट्टै बुझाउनु पर्नेछ। यस सामूहिक आवासभित्र एक सामुदायिक भवनसहित, गणेशको एक मन्दिर र एक खुला पार्कसमेतको निर्माण गरिनेछ।
आवासभित्र महानगरबाट स्वीकृत ६ मिटर चौडा भएको पिचसडकसहित आधुनिक ढल निकास र खानेपानीको पाइपलाइनको व्यवस्थासमेत गरिनेछ। योजना प्रमुख भट्टराईले आगामी ३० महिनासम्म दैनिक १ सय कामदारले निर्माण कार्य गर्ने उल्लेख गर्दै हाल ३० जनाले काम गरिरहेको जानकारी दिए ।
भट्टराईले ग्राहकले घर खरिद गरिसकेपछि आफ्नो इच्छाअनुसार थप्न, फोर्न, भत्काउन नपाइने नियम रहेको सुनाए। उनले अनुभवी जनशक्तिले मापदण्डअनुसारका गिटी, बालुवा, सिमेन्ट, डन्डी र अन्य केमिकलको प्रयोग गरेर घर बनाउने जिकिर गरे। आवासका लागि विराटनगर महानगरपालिकाबाट नक्सा पास लगायतका सबै प्रक्रियाहरूको काम भईरहेको छ । महानगरपालिकाले आगामी हप्ता भित्रमा इजाजत दिएपछि कंक्रिटीङको काम सुरु गर्नेछौं, भट्टराईले भन्नुभयो–यस योजनामा सीई ग्रुपले सबै कामहरु एउटै हाउसबाट गर्नेछ । नेपाल सरकारको शहरी विकास मन्त्रालयअन्तर्गतको बबर महलस्थित भवन विभागले जारी गरेको राष्ट्रिय भवनसंहिताका प्रावधानभित्र रहेर सामूहिक आवासका घर बनाइनेछ ।
यस्ता घरहरू भूकम्प प्रतिरोधी हुने दाबी छ। यस्ता घरलाई ख वर्गका घर भन्ने गरिन्छ। सीई ग्रुपले उपत्यकाबाहिर १६ वर्षअघि २०६२ सालमा धरानको गणेशमान चौकमा १४ कठ्टा जमिनमा १५ वटा घरको सामूहिक आवास निर्माण गरेर विक्री गरेको थियो । सीईले उपत्यकाबाहिर धरानपछि विराटनगरमा दोस्रो पटक कारबार गर्न लागेको हो।
