सुनसरी, भाद्र २५
पूर्वपश्चिम राजमार्ग अन्तरगत सुनसरी जिल्लाको नरसिंह गाविसमा आज बिहान स्कर्टींङमा रहेका सवारी साधनहरुमा बन्दकर्ताहरुले ढुङा मुढा गर्दा एक ट्रकका चालक र सह-चालक घाइते भएका छन्।
लुकेर बसेका बन्दकर्ताहरुले नरसिंह गाविस ९ स्थित राजमार्गमा सुरक्षाकर्मीको स्कर्टीङमा रहेका सवारी साधनहरुलाई लक्षित गरी ढुङा मुढा गरेका थिए।
ढुङा मुढाबाट ना. ३ ख ७७५५ नम्बरको ट्रकका चालक जिल्ला रामेछाप फुलासे गाविस बस्ने ३५ वर्षिय ईश्वर कार्की र सोही स्थान बस्ने ४० वर्षिय सह-चालक पुत्रमान तामाङ घाइते भएका छन्।
ढुङा मुढाका कारण चालकले नियन्त्रण गुमाउँदा उक्त ट्रकसमेत सडकबाट तल पल्टिएको थियो।
घाइते चालकलाई उपचारकालागि गोल्डेन अस्पताल बिराटनगर ल्याइएको छ भने सह-चालकको जिल्ला अस्पताल सुनसरीमा उपचार गराईएको छ।
