कुनै बेला कोरोना भाइरस सङ्क्रमणको उच्च जोखिममा रहेको सुदूरपश्चिम प्रदेशमा हाल सङ्क्रमण दर ओरालो लाग्दै गएको छ ।
भारतसँग सीमा जोडिएको यस प्रदेशमा कोरोना भाइरस सङ्क्रमितको सङ्ख्या न्यून रहेको छ । यो हप्ताको शुक्रबार र आइतबार यस प्रदेशमा सङ्क्रमितको सङ्ख्या शून्य झरेको स्वास्थ्य निर्देशनालयले जनाएको छ । अन्य दिनहरुमा पनि सङ्क्रमितको सङ्ख्या पाँचभन्दा पनि कम रहेको छ । हप्ताको दोस्रो दिन सोमबार पाँच जनामा, मङ्गलबार र बुधबार एक÷एकजनामा, बिहीबार दुईजनामा सङ्क्रमण पुष्टि भएको थियो ।
भारतमा कोरोना भाइरसको नयाँ भेरियन्ट ओमिक्रोन तीव्र रुपमा फैलिएसँगै गत माघमा त्यसको प्रभाव यस प्रदेशमा पनि देखिएको थियो । त्यसपछि यहाँका झुलाघाट, पुलघाट, जौलजीवी, गड्डाचौकी र त्रिनगर नाकाबाट फर्किने अधिकांशमा कोरोना भाइरस सङ्क्रमण देखिन थालेको थियो ।
हाल भने सङ्क्रमण दर निकै कम रहेको सुदूरपश्चिम प्रदेश स्वास्थ्य निर्देशनालयका कोभिड–१९ सम्पर्क व्यक्ति हेमराज जोशीले जानकारी दिए । उनले भने, ‘विश्वव्यापी रुपमा कोरोना भाइरस सङ्क्रमण घटेको छ, छिमेकी राष्ट्र भारतमा पनि सङ्क्रमणदर न्यून छ, त्यसकै प्रभाव सुदूरपश्चिममा पनि हो ।’
हाल सङ्क्रमण दर घटेको भए पनि जोखिम भने कायमै रहेको उनले बताए । अन्तरराष्ट्रिय स्वास्थ्य नियमावली २००५ अनुसार सीमानाकामा परीक्षण कार्य जारी राखिएको जनाइएको छ । जोखिम कायमै रहेकाले यहाँका भारतसँग सीमा जोडिएका सबै नाकाहरुमा स्वास्थ्य चेकजाँचमा कडाइ नै गरिएको कोभिड–१९ सम्पर्क व्यक्ति हेमराज जोशीले जानकारी दिए ।
सीमा नाकामा आवश्यक जनशक्ति परिचालन गरेर परीक्षणको काम निरन्तर रुपमा भइरहेको छ । उनले भने, ‘अहिले न्यून मात्रामा सङ्क्रमण देखिएको भए पनि सीमानाकामै हेल्थ डेस्क स्थापना गरी एन्टिजेन परीक्षणमार्फत परीक्षणको काम भइरहेको छ ।’ पूर्वनिर्धारित कार्यक्रमअनुसार नै सीमाक्षेत्रको जोखिम व्यवस्थापनको काम भइरहेको हो ।
प्रदेशका तीन जिल्ला सङ्क्रमणमुक्त
कोरोना भाइरस सङ्क्रमण दर ओरालो लागेसँगै सुदूरपश्चिमका तीन जिल्लामा सङ्क्रमण शून्य रहेका छन् । प्रदेशका नौ जिल्लामध्ये डोटी, अछाम र बाजुरामा हाल एकजना पनि कोरोना भाइरस सङ्क्रमणका सक्रिय सङ्क्रमित नरहेको निर्देशनालयको तथ्याङ्कमा उल्लेख छ ।
प्रदेशका अन्य जिल्लामा गरी कूल ४० जना सक्रिय सङ्क्रमित रहेका छन् । सबैभन्दा बढी कैलालीमा २५, कञ्चनपुरमा नौ, बैतडीमा तीन, दार्चुला, डडेल्धुरा र बझाङमा एक-एकजना मात्रै सक्रिय सङ्क्रमित रहेका छन् । सक्रिय सङ्क्रमितमध्ये दुईजनाको सेती प्रादेशिक अस्पतालको आइसियु कक्षमा उपचार भइरहेको छ भने अरू सबै होम आइसोलेशन छन् ।
सुदूरपश्चिममा हालसम्म ५९ हजार ५९२ जनामा कोरोना भाइरस सङ्क्रमण पुष्टि भएको छ । पाँच लाख २३ हजार ६९९ जनाको नमूना परीक्षण गर्दा उक्त सङ्ख्यामा कोरोना सङ्क्रमण देखिएको हो । सङ्क्रमणकै कारण यस प्रदेशमा हालसम्म ६३३ जनाको मृत्यु भइसकेको छ ।
सङ्क्रमण दर कम भएको भए पनि जोखिम कायमै रहेकाले जनस्वास्थ्यका मापदण्ड अनिवार्य रुपमा पालना गर्न निर्देशनालयले सबैमा आग्रह गरेको छ । सम्र्पक व्यक्ति जोशीका अनुसार कोरोना भाइरस सङ्क्रमणको रोकथाम तथा नियन्त्रणका लागि कोरोना भाइरसविरुद्धको खोप अभियानलाई बढाइएको छ ।
प्रदेशका सबै स्थानीय तहमा हाल कोरोना भाइरसविरुद्धको खोप अभियान जारी रहेको छ । पहिलो मात्रा लगाएको २८ दिनपछि दोस्रो मात्रा र ६ महिनापछि बुस्टर डोज दिइन लागिएको हो । यसअघि लगाउन छुटेका सबैलाई खोप लगाउन आग्रह गरिएको छ ।
