काठमाडौं । नेपाल र केन्याबीचको पाँचौँ तथा निर्णायक टी–२० क्रिकेट आज हुँदैछ । खेल नैरोबी जिमखाना क्रिकेट मैदानमा आज दिउँसो पौने चार बजे सुरु हुनेछ।
पाँच खेलको शृङ्खलामा २–२ को बराबरी भएको छ । सोमबार भएको चौथो खेलमा नेपाल घरेलुु टोली केन्यासँग ७ रनले पराजित भएपछि शृङ्खला बराबरी भएको हो । जितको लागि १ सय २ रनको विजयी लक्ष्य पछ्याएको नेपालले २० ओभरमा ९ विकेट गुमाएर ९४ रन मात्रै बनायो ।
टस जितेर पहिला ब्याटिङ गरेको केन्या निर्धारित २० ओभरमा १ सय १ रनमा अल आउट भएको थियो । केन्यासँगको पहिलो खेलमा नेपाल ५ विकेटले विजयी भएको थियो भने दोस्रो खेलमा १८ रनले पराजित भएको थियो । त्यस्तै तेस्रो खेलमा नेपाल ४ विकेटले विजयी भएको थियो ।
टी–२० शृङ्खलापछि नेपालले घरेलु टोलीसँग तीन खेलको एकदिवसीय शृङ्खला खेल्नेछ । पहिलो खेल आउँदो १७ गते, दोस्रो खेल १८ गते र तेस्रो खेल २० गते हुने तालिका छ।
