विराटनगर । पूर्वाञ्चल विश्वविद्यालयले मेडिकल शिक्षण सुरु गर्ने तयारी गरेको छ । चिकित्सा शिक्षा आयोगले मेडिकल सञ्चालनका लागि राय दिइसकेको छ । चिकित्सा शिक्षा आयोगको रायका आधारमा मन्त्रीपरिषद्ले त्यसलाई स्वीकृति दिनुपर्नेछ । तर, पूर्वाञ्चल विश्वविद्यालयको आफ्नै शिक्षण अस्पताल छैन ।
पूर्वाञ्चल विश्वविद्यालयका उपकुलपति डा.यादवराज कोइरालाका अनुसार मन्त्रिपरिषद्ले कोसी अस्पतालाई शिक्षण अस्पतालको रुपमा प्रयोग गर्न दिने अनुमति समेत दिनुपर्ने हुन्छ । त्यसपछि पूर्वाञ्चल विश्वविद्यालयलाई मेडिकल कलेज सञ्चालनको बाटो खुल्नेछ ।
पूर्वाञ्चल विश्वविद्यालयले त्यस बाहेक गंगालालसँग समेत अस्पताल सञ्चालनका लागि सहकार्य गर्ने भएको छ । गंगालालको शाखा विस्तारको रुपमा गोठगाउँमा अस्पताल खोल्ने विषय समेत छलफलमा अगाडी बढेको उपकुलपति कोइरालाले जानकारी दिनुभयो ।
केन्द्रीय कार्यालय गोठगाउँमा रहेको पूर्वाञ्चल विश्वविद्यालयले मेडिकल कलेज सञ्चालनमा ल्याए मोरङमा मात्रै तीनवटा मेडिकल कलेज हुनेछन् । नोबेल मेडिकल शिक्षण, विराट शिक्षण र पूर्वाञ्चल विश्वविद्यालय मेडिकल कलेज हुनेछन् । तर, तत्काल भने कोसीमा शिक्षण अस्पताल सञ्चालन गर्नुपर्ने भएकोले मेडिकल कलेज गोठगाउँमा भएपनि विराटनगरमै अर्को शिक्षण अस्पताल कोसी हुनेछ ।
फोटो:फाइल/सुमन सुस्केरा
