बेलबारी अन्तर्राष्ट्रिय आमन्त्रण गोल्डकप फुटबल प्रतियोगिताको उद्घाटन खेलमा आज (मंगलबार) पेम्बा युथ क्लब विराटनगर र रोलिङ एफ सी झापाबीच खेल हुनेछ ।
बेलबारी नगरपालिका–११ लक्ष्मीमार्गस्थित लक्ष्मी माध्यमिक विद्यालयको मैदानमा पाँचौं संस्करणको गोल्डकपको आज दिउँसो ३ बजे उद्घाटन हुनेछ । आगामी कार्तिक २५ गतेसम्म सञ्चालन हुने प्रतियोगितामा नेपालका ७ र विदेशका ३ गरेर १० वटा टिमको सहभागिता रहेका छन्।
उद्घाटन खेलका प्रतिस्पर्धी विराटनगर र झापासहित प्रतियोगितामा आयोजक डाँगीहाट युथ क्लब लक्ष्मीमार्ग, साहारा क्लब पोखरा, सशस्त्र प्रहरी बल काठमाडौं, सहलेस युथ क्लब सिरहा र राजारानी फुटबल क्लब धनकुटा तथा भारतको एमएम एफ सी वेष्ट बंगाल, युनाइटेड ब्रदर्श कालिङम्पोङ एवं क्यामरुनको एभिनीयर फुटबल क्लब सहभागी छन् । प्रतियोगिताको चौथो संस्करणको उपाधि सशस्त्र प्रहरी बलले उचालेको थियो ।
प्रतियोगिताको विजेता टिमले ८ लाख १ हजार र उपविजेताले ४ लाख १ हजार नगद पुरस्कार पाउने छन्। प्रतियोगिता डाँगीहाट युथ क्लबले आयोजना गरेको हो ।
