विराटनगर । विराटनगरस्थित जिल्ला कारागार मोरङमा एक जना कैदीको मृत्यु भएको छ ।
तेह्रथुमको आठराई गाउँपालिका-४ का ५४ वर्षीय मानबहादुर खपांगीको मृत्यु भएको निमित्त जेलर तुलसीराम भगतले जानकारी दिए ।
खपांगीलाई जिल्ला अदालत तेह्रथुमले २०७४ माघ ९ गते १० वर्ष कैद सजायको फैसला गरेको थियो । जेलर भगतका अनुसार तेह्रथुमबाट २०७६ मंसिर २४ गते स्थानान्तरण गरेर मोरङ ल्याइएको थियो । बिरामी परेपछि उपचारका लागि कात्तिक १२ गते बिहान विराटनगरस्थित कोसी अस्पताल भर्ना गरिएको उनी उपचारका क्रममा मंगलबार साँझ ६ः१० बजेतिर मृत्यु भएको जानकारी भगतले दिए ।
खपांगीलाई पेट र पायल्सको पुरानै समस्या थियो र पछिल्लो समय खाना रुची नहुने समस्या पनि थपिएको कारागारले जनाएको छ ।
जेलर भगतका अनुसार मृतकको शव कोसी अस्पतालमै राखेर आफन्त र परिवारका सदस्यलाई घटनाको जानकारी गराइसकिएको छ ।
