प्रेम देवान
विराटनगर २६ चैत्र । गत माघ २९ बाट प्रदर्शनमा आएको फिल्म ’प्रेमगीत’ले रिलिजको ५१ दिने सफलताको खुशी साट्दै प्रेमगीत को तयारी गरेको छ । राजधानीमा आयोजित एक कार्यक्रमका बीच ’प्रेमगीत’ युनिटले फिल्मकर्मी र सञ्चारकर्मीबीच सफलताको खुशि साटेको हो ।
कार्यक्रममा ’प्रेमगीत’ कभर गीत प्रतिस्पर्धाको उत्कृष्ट १० बाट एक जनालाई बिजयी घोषणा पनि गरेको छ । संगीतकार अर्जुन पोखरेल, गायिका अञ्जु पन्त र कथाकार तथा निर्देशक रामशरण पाठकको निर्णायक टिमले उत्कृष्ट १० बाट ५ छान्दै अन्त्यमा सागर संसार राईलाई बिजयी घोषित गरेको छ ।
बिजयी राईलाई सञ्चारमन्त्री शेरधन राईले १ लाख पुरस्कार राशीको चेक हस्तान्तरण गर्नुभयो । त्यस्तै फिल्मको सफलताका सहयोगी हात बनेका फिल्म भित्रको सदस्य र सञ्चारकर्मीहरुलाई मायाको चिनो पनि प्रदान गरिएको छ ।
कार्यक्रममा बोल्दै दर्शकको चाहना र भावना अनुसारको विषय र प्रस्तुती समेटेर ’प्रेमगीत’ बनाएको भन्दै निर्देशक सुदर्शन थापा र निर्माता सन्तोष सेनले यो सबै सफलताको श्रेय दर्शक र मिडियालाई दिए ।
त्यस्तै निर्माता सेनले ’प्रेमगीत’को सिक्वेल पनि बनाउने घोषणा गरे । उनले स्कृप्टको लागी पुरस्कार सहितको पुनः प्रतिस्पर्धा घोषणा गरका छन् । आशुसेन फिल्मस् लाई सम्पर्क गर्ने ईच्छुक व्याक्तिले आफ्नो ’वान लाईन स्टोरी’ पठाउनुपर्ने र त्यसमध्येको उत्कृष्ट १ जनालाई १ लाख धनराशी को पुरस्कार दिने घोषणा गरिएको छ ।
