सुनसरी । सुनसरी क्षेत्र नं १ को प्रदेशसभा (१) मा नेकपा (एमाले) का उम्मेदवार रमेशकुमार बस्नेत विजयी हुनुभएको छ ।
आज सार्वजनीक भएको प्रदेशसभाको अन्तिम मतपरिणामअनुसार बस्नेतले निकटतम प्रतिद्वन्द्वी सत्ता गठबन्धनबाट नेपाली कांग्रेसका उम्मेदवार उमेश थापालाई एक हजार तीन सय ५० मतान्तरले पराजित गर्नुभएको हो ।
बस्नेतले ११ हजार एक सय दुई तथा कांग्रेसका थापाले नौ हजार सात सय ५२ मत प्राप्त गर्र्नुभएको जिल्ला निर्वाचन कार्यालयले जनाएको छ । प्रदेशसभा (१) मा कुल ३९ हजार सात सय १३ मत खसेकामा ३७ हजार नौ सय ४२ मत सदर भएको थियो ।
यसैगरी सुनसरी क्षेत्र नं २ प्रदेशसभा (१) मा एमालेका रेवतीरमण भण्डारी विजयी हुनुभएको छ । उहाँले इटहरी उपमहानगरपालिकाका पूर्वमेयर, माओवादी केन्द्रका द्वारिकालाल चौधरीलाई पराजित गर्नुभएको हो । भण्डारी नेकपा एमाले सुनसरीका अध्यक्षसमेत हुनुहुन्छ । भण्डारीले १४ हजार पाँच सय २८ तथा चौधरीले ११ हजार आठ सय ४५ मत प्राप्त गर्नुभएको छ । दुवैजनाबीच दुई हजार छ सय ८३ मतान्तर रहेको छ ।
त्यसैगरी राप्रपाका मोहनबहादुर खत्रीले नौ हजार ३२२ तथा स्वतन्त्र उम्मेदवार दीपेन्द्र घिमिरेले तीन हजार २०८ मत प्राप्त गर्नुभएको छ ।
