विराटनगर । मोरङको बुढीगंगा गाउँपालिका–२ अमाहीमा एक महिलाको रहस्यमय ढंगबाट हत्या भएको छ । भर्खरै प्रहरीले नर्सिङ चौधरीको घरबाट महिलाको लास बरामद गरेको हो ।
स्थानीयवासी तथा जनप्रतिनिधि मिना विश्वासले घटनाको बारेमा जानकारी दिए अनुसार आइतबार उक्त घरमा दुईजना युवाहरु आएका थिए । केहि समयपछि चौधरीसँग चिनजान भएका अर्का एक व्यक्तिले मोटरसाइकलमा राखेर महिलालाई त्यहाँसम्म ल्याएर छोडेका थिए । महिलालाई लिएर आएका व्यक्ति र घरधनी चौधरी घर बाहिर निस्केपछि दुईजना केटा र महिला घरमा थिए ।
एक घण्टापछि चौधरी घरमा आउँदा दुईजना केटाहरु मात्रै भेटिएका थिए । उनीहरु त्यसपछि गएपनि महिलालाई चौधरीले नभेटाएको दावी गर्दै आएका छन् । तर, चौधरीको घर परिसरमै रहेको ग्वालीमा थुपारिएको पराल र भुसको थुप्रो भित्र बोरामा हालेको अवस्थामा महिलाको लास सोमबार फेला परेको हो ।
घटनामा संलग्न रहेको आशंकामा प्रहरीले दुईजनालाई नियन्त्रणमा लिएको छ । मोरङ प्रहरीका प्रहरी नायव उपरीक्षक दिपक पोखरेलले घटनामा संलग्न आरोपमा दुईजना पक्राउ परिसकेको जानकारी दिएका छन् । अहिलेसम्म मृतक महिलाको नाम र पक्राउ परेकाहरुको नाम सार्वजानिक गरिएको छैन । प्रारम्भिक चरणको अनुसन्धानको काम अगाडी बढिसेकेको प्रहरी उपरीक्षक पोखरेलले जानकारी दिएका छन् । घटना रहस्यमय रहेको भन्दै प्रहरीले यसको फहरिस्त खोजिरहेको दावी गरेको छ ।
