विराटनगर । विराटनगरमा छायांकन भएको फिल्म ‘बिहे पास’ को टिजर सार्वजनिक भएको छ।
बुधबार 'बुढासुब्बा डिजिटल' युट्युब च्यानलमार्फत फिल्मको टिजर सार्वजनिक गरिएको हो।
सार्वजनिक टिजरमा अभिनेता दयाहाङ राई र अभिनेत्री प्रकृति श्रेष्ठ पति पत्नीको रुपमा देखिएका छन् । जहाँ प्रकृति सरकारी अधिकृत र दयाहाङ भने सरकारी जागिरको खोजीमा मरिमेटेको देख्न सकिन्छ ।
प्रवेश पौडेलले निर्देशन गरेको फिल्म ‘बिहे पास’ मा दयाहाङ र प्रकृतिसँगै रविन्द्र झा, बुद्धि तामाङ, शिशिर वाङ्देल, रूषा न्यौपाने, श्याम राई, विशाल पहारी, सुवास गजुरेल, हिउँवाल गौतम, नविन शेरचन, प्रकाश भुजेल, उमा बानियाँलगायत कलाकारको अभिनय छ।
रोहित कट्टेलको प्रस्तुतिमा तयार भएको फिल्ममा रत्न श्रेष्ठ कार्यकारी निर्माता र रोजन श्रेष्ठ निर्माताको रुपमा छन्। शिव ढकालले छायांकन गरेको फिल्मलाई मित्रदेव गुरुङले सम्पादन गरेका हुन्। आरआर फिल्म प्रोडक्शनको निर्माण र वितरण रहेको फिल्म विराटनगरसहित पूर्वी नेपालका विभिन्न रमणीय स्थलमा खिचिएको हो ।
यो फिल्म वैशाख १ गतेदेखि प्रदर्शन हुँदैछ। यही मितिमा दयाहाङ र मिरुना मगर अभिनीत फिल्म ‘जारी’ प्रदर्शन हुनेछ।
भिडियो हेर्नुहोस् :
