विराटनगर । विराटनगर–२ स्थित तुलसी बहुमुखी बहेउद्देश्यीय सहकारी संस्था लिमिटेडका आठजना विरुद्ध प्रहरीले ठगी कसुरमा मुद्दा दर्ता गरेर अनुसन्धान सुरु गरेको छ । नेपालभर कार्यक्षेत्र भई विराटनगरमा मुख्य कार्यलय भएको सहकारीले ठगी गरेको भन्दै १२१ बना बचतकर्ताले आइतबार जाहेरी दिएपछि प्रहरीले पक्राउ परेका तीनजनालाई सोमबार सार्वजानिक गरेको हो ।
प्रहरीले संस्थाका क्षेत्रीय प्रवन्धक विराटनगर–२ का मन्दिप खवास, उर्लाबारी नगरपालिका ६ घर भई संस्थाको उपाध्यक्ष अनिता गौतम र झापा भद्रपुर–१४ घर भई सहकारी संस्थाको सचिव सविना न्यौपानेलाई सार्वजानिक गरेको हो ।
सहकारीमा २१ हजार ७१३ जना सदस्य रहेको देखिएको छ । जसमध्ये चारहजार सदस्य विराटनगरमा रहेको मोरङका प्रहरी उपरीक्षक दिपक पोखरेलले जानकारी दिएका छन् । सोमबार सहकारीको विषयमा जानकारी दिन आयोजित पत्रकार सम्मेलनमा प्रहरी उपरीक्षक पोखरेलले १२ करोड ९ लाख चार हजार ४८७ रुपिँया ठगी भएको उजुरी प्राप्त भएको जानकारी दिएका छन् ।
२०५२ साल चैत १३ गते सहकारी विभागमा ४१७-०५२-०५३ दर्ता नम्बरमा दर्ता भएका सहकारीका विराटनगरमा मुख्य कार्यालय भई झापाको दमक, उदपयुरको गाईघाट र सिरहाको गोलबजारमा सेवा केन्द्र रहेका छन् ।
गत फागुन १ गतेदेखि सहकारी संस्थाको कार्यालयहरु बन्द गरेर सञ्चालक फरार रहेका छन् । बाल बचत÷ज्येष्ठ नागरिक बचत÷भविष्य सुनिश्चित बचत÷सुपर पेन्सन बचत÷अवधी बचत÷कर्मचारी चल्ती बचत-विशेष बचत-साधारण बचत लगायतका खाताहरु सञ्चालन गरेर शेयर सदस्य हुँदा १५ प्रतिशतसम्म ब्याज, बोनस दिने आकर्षक योजनाका प्रलोभन देखाएर रकम ठगी गरेको जाहेरवालाले दिएको उजुरीमा उल्लेख गरिएको छ ।
बचतकर्ता रमा पौडेलसहित १२१ को उजुरी दर्ता भएपछि प्रहरीले अनुसन्धान सुरु गरेको हो । प्रहरीले थप बचतकर्ता ठगीमा परेको भए उजुरी दिन आह्वान गरेको छ । आह्वान गरिएसँगै सोमबारदेखि जिल्ला प्रहरी कार्यालय मोरङमा उजुरीकर्ताको लाइन लागेको छ ।
सञ्चालकले योजनावद्ध तरिकाले ठुलो रकम हिनामिना गरेर बचतकर्तालाई ठगी गरेको प्रारम्भिक अनुसन्धानमा देखिएको छ ।
