विराटनगर । निलो आकाश बचत तथा ऋण सहकारी संस्थाले विविध कार्यक्रम गरी आफ्नो १२ औँ वार्षिकोत्सव मनाएको छ ।
विराटनगर ५ जानकी चौकमा रहेको सहकारीले सरसफाई , स्वास्थ्य शिविर लगायतका सामाजिक कार्य गर्दै वार्षिकोत्सव मनाएको हो ।
सहकारीले सोमबार आफ्नो कार्यालय आसपासमा सरसफाइ कार्यक्रम गरेको छ । विराटनगर महानगरपालिकाको सरसफाईको टिमसहित सहकारीमा आवद्ध सेयर सदस्य तथा स्थानीयवासीको उपस्थितीमा सरसफाई गरिएको सहकारीका अध्यक्ष सुनिल कुमार श्रेष्ठले जानकारी दिए।
त्यसैगरी सहकारीले मंगलबार विराटनगर ५ स्थित सिद्धकाली स्कुल परिसरमा स्वास्थ्य शिविर आयोजना गरेको छ । लाईफ गार्ड हस्पिटलको प्राविधिक सहयोगमा मधुमेह , प्रेसर, सुगर, स्त्री तथा बालरोग सम्बन्धी चेकजाच गरिएको छ । स्वास्थ्य शिविरमा बिरामीहरुलाई नि:शुल्क औषधी समेत वितरण गरिएको थियो ।
स्वास्थ्य शिविरमा १०६ बर्षका बुबा कृतिराज गिरीले समेत स्वास्थ्य जाँच गरी कार्यक्रमको सुरुवात गरिएको थियो ।
स्वास्थ्य शिविरमा १३२ जनाले स्वास्थ्य सेवा लिएको सहकारीकी कोषाध्यक्ष विष्णु तामाङ्गले जानकारी दिए ।
