विराटनगर । पूर्वसभामुख दमननाथ ढुंगानाको निधन भएको छ । आइतबार दिउँसो फ्रन्टलाइन अस्पतालमा उपचारको क्रममा ढुंगानाको निधन भएको हो । अस्पतालमा उनको कलेजो सम्बन्धी समस्याको उपचार भईरहेको थियो ।
ढुंगाना २०४८ सालदेखि २०५१ सम्म सभामुख थिए । उनी वरिष्ठ अधिवक्तासमेत हुन् । पञ्चायतकालमा विद्यार्थी संगठन बनाएर राजनीतिक यात्रा सुरु गरेका उनले वरिष्ठ अधिवक्ता, मानवअधिकारवादी र नागरिक समाजको अगुवाको पहिचानका थिए । ०२८ सालमा नेपाल बार एसोसियसनको महासचिव बनेका उनी पत्रकारिता र शिक्षण पेशामा समेत संलग्न भएका थिए ।
०४८ सालमा काठमाडौंबाट प्रतिनिधिसभा सदस्यमा निर्वाचित भएपछि उनी सभामुख बनेका थिए । ०५१ सालको मध्यावधि चुनावमा विद्या भण्डारीसँग पराजित भएपछि ढुंगाना शान्ति अभियानमा खुलेर लागेका थिए । उनी सरकार–माओवादी शान्ति वार्ताका सहजकर्ता समेत थिए । उनी आन्दोलनकारी माओवादीसँग उदारभाव राखेर नेपालको शान्ति प्रक्रियालाई सहज बनाउन लागेका थिए ।
