काठमाडौं । राष्ट्रिय प्रजातन्त्र पार्टीका निवर्तमान राष्ट्रिय अध्यक्ष पशुपति शम्शेर राणाले सरकारले निर्वाचन तर्फ देशलाई अघि नबढाए मुलुक ठूलो दुर्घटनाको शिकार हुने बताए । उनले लामो समयदेखि नभएको स्थानीय निकायको निर्वाचन गराउँदै समयसीमा भित्रै अन्य तहको निर्वाचन गराउन अपरिहार्य भएको बताए ।
पार्टी कार्यालय धुम्बाराहीमा आयोजित पद हस्तान्तरण कार्यक्रममा निवर्तमान राष्ट्रिय अध्यक्ष राणाले तीन ठूला राजनीतिक दललका अडानका कारण मुलुक निर्वाचन तर्फ अघि नबढेको आरोप लगाए । उनले तीन शीर्ष दलले निर्वाचन तर्फ जाने मार्ग प्रशस्त नगरे मुलुक दुर्घटनाको शिकार हुने बताए ।
त्यसैगरि बुधबार देखि राष्ट्रिय अध्यक्षको पदभार सम्हाल्दै डा. प्रकाश चन्द्र लोहनीले तीन शीर्ष दलहरुमा दुरदृष्टि नभएका कारणले मुलुकले विभिन्न संकटहरुको सामना गर्नुपरेको बताए । उनले तीन शीर्ष दलको फरक फरक अभिव्यक्तिका कारण मुलुक निर्वाचन तर्फ पनि नबढ्दा समस्या थपिएको बताए ।
कार्यक्रममा राष्ट्रिय अध्यक्ष लोहनीले मुलुकमा आउने समस्याको समाधान गर्न दत्तचीत्त भएर लाग्न सबै कार्यकर्ताहरुलाई आग्रह समेत गरे ।
