धनकुटा । धनकुटाको साँगुरीगढीमा प्रहरीले लागुऔषध गाँजा कारोबारमा संलग्न ६ जनालाई हवाई फायर गरी नियन्त्रणमा लिएको छ।
कोशी प्रदेश प्रहरी कार्यालय विराटनगरका अनुसार पक्राउ पर्नेहरूमा सहिदभूमि गाँउपालिका-१ का नकुल राई (३४) र ओमप्रकाश राई (२१) तथा साँगुरीगढी-८ का मंगलकुमार राई (२८), बिसन राई (२९), थामबहादुर राई (२६) र सुमन राई (२१) रहेका छन्।
कोशी प्रदेश प्रहरी प्रवक्ता एसएसपी भीमबहादुर दाहालका अनुसार साँगुरीगढी गाउँपालिका-९ को सडक खण्डमा ५ वटा मोटरसाइकलमा गाँजा ओसारपसार भइरहेको सूचना प्राप्त भएपछि प्रहरीले कारबाही गरेको थियो। मोटरसाइकललाई रोक्न खोज्दा सवार व्यक्तिहरूले प्रहरी टोलीमाथि हातपात र ढुंगामुढा गरेपछि एक राउण्ड हवाई फायर गर्नुपरेको थियो।
बुधबार बिहान सवा ४ बजेतिर इलाका प्रहरी कार्यालय भेडेटारको टोलीले को ३८ प ३५२२, प्रदेश १-०२-०५३ प ९६६३, प्रदेश १-०२-०५३ प ८६१७, प्रदेश १-०२-०४३ प ९५९६ र को १४ प ७७५० नम्बरका मोटरसाइकलसहित १२० केजी गाँजा बरामद गरेको छ। पक्राउ परेका व्यक्तिहरूलाई थप अनुसन्धान तथा कारबाहीका लागि जिल्ला प्रहरी कार्यालय धनकुटामा राखिएको एसएसपी दाहालले जानकारी दिए।
