प्रेम देवान
विराटनगर । जनसहुलियतका लागि सार्वजनिक यातायातको आधुनिक विकल्पको रुपमा रहेको नगर बस सञ्चालनमा विराटनगर महानगरपालिकाले सार्वजानिक–निजी अवधारणा अगाडी सारेको छ । प्रदेश लगानी प्राधिकरणमार्फत लगानी जुटाएर आर्थिक वर्ष २०७९÷८० मा ‘नगर बस सेवा’ सञ्चालन गर्ने घोषणा गरिएको थियो । तर, प्रदेश लगानी प्राधिकरणले यो प्रक्रियाको सहजीकरणमा अलमल गरेपछि महानगरपालिका आफैंले नगर बस सञ्चालन गर्ने तयारी थालेको हो ।
घोषणा गरेको तीनबर्ष वितिसक्दा पनि नगर बस सेवा संचालनबारे अत्तोपत्तो नभएपछि नगरवासीले यसको आलोचना गर्दै आएका थिए । नगर बस सञ्चालन योजनामा असफल हुँदा महानगरपालिकाका सफल योजनामा समेत त्यसैको नाम जोडेर आलोचना हुने गरेको थियो । विराटनगर महानगरपालिकाले नगर बस सञ्चालनका लागि सार्वजानिक सुचना आह्वान गरेको छ । जसमा सार्बजनिक निजी साझेदारीको अवधारणालाई अगाडी सारिएको छ । सार्वजानिक निजी साझेदारी ऐन, २०७८ को दफा २० बमोजिम ईच्छुक व्यक्ति , संघ सस्थाहरुलाई २०८२ साल साउन ९ गते पहिलोपटक सार्वजनिक सूचनामार्फत आह्वान गरिएको हो । यसको म्याद ३० दिनको रहेको छ ।
महानगरले सुरुवातमा क्षेत्रभित्र ५ देखि १९ वटा वातानुकूलित बस सञ्चालन गर्ने घोषणा गरेको थियो । नगर बस सेवा संचालनमा ढिलाई हुँदा विराटनगर जस्तो बढ्दो सहरीकरण भएको क्षेत्रमा अत्यावश्यक योजना मानिएको थियो । तर यस्ता जनमुखी योजनाहरू समयमै कार्यान्वयन हुन नसक्नुले नगरपालिकाको क्षमता र जिम्मेवारीमाथि प्रश्न उठ्दै आएको छ । महानगरले विराटनगरमा नगर बस संचालन गर्नको लागि ५ वटा रुट तयार गरेको छ ।
