विराटनगर । विराटनगरको ऐतिहासिक राधाकृष्ण रथयात्रा अहिले राधाकृष्ण मन्दिरबाट अगाडी बढेको छ । रथ जतिजति अगाडी बढ्दै जान्छ त्यतित्यति ‘राधे कृष्ण, गोपाल कृष्ण’ मन्त्रोउच्चारण भइरहेको छ । रथबाट प्रधान सारथी पण्डित भवानी शंकर निरौलाले यसलाई अगाडी बढाउन भूमिका निर्वाह गर्नुहुन्छ ।
विश्रामस्थलमा रोक्दा र विश्रामस्थलबाट रथ अगाडी बढ्दा सावधान भन्ने कासन पण्डित निरौलाले हुनेछ ।
यस पटक गुडीरहेको रथलाई रोक्नका लागि अगाडीको भागमा हाइड्रोलिक ब्रेक जडान गरिएको छ । नयाँ रथ निर्माण गर्दा भरसक रथलाई अगाडी बढाउन र रोक्न सहज होस भनेर यस्तो सुविधा थप गरिएको हो । नगरका विभिन्न स्थानमा स्वयम् सेवा भावले पीउने पानी तथा पर्सादीको प्रवन्ध संघसंस्था तथा व्यक्तिहरुले गरेका छन् । त्यति नै मात्रामा रथयात्राका दिन सहभागी हुने भक्तजनका लागि विभिन्न गुलिया परिकार बनाएर व्यापार गर्नेहरु पनि सडकसँगै जोडिएर बसेका छन् ।
विराटनगरको राधाकृष्ण रथयात्रा हिन्दुधर्मालम्बीको मात्रै नभई यो सामाजिक एकता र साँस्कृतिक विविधताको प्रतिकको रुपमा हेरिन्छ । यहाँ इस्लाम र बौद्ध धर्मालम्बीहरु समेत सहभागि हुने गरेका छन् । आस्था राख्ने र नराख्ने सबै नागरिकको साझा र एकता झल्काउने रथयात्रा निकालिएसँगै अहिले नगर राधे कृष्ण, गोपाल कृष्णको धुनमा गुन्जयमान बनेको छ ।
