विराटनगर । नेपालका लागि इजरायली राजदूत स्मुलिम एरी बास र विराटनगर महानगरपालिकाका पदाधिकारीबीच भेटवार्ता भएको छ । विराटनगर आउनु भएका राजदूतले बुधबार
मेयर नागेश कोइरालासँग भेटघाट तथा छलफल गरेका हुन् ।
उपमेयर शिल्पा निराला कार्की र प्रमुख प्रशासकीय अधिकृत योगेन्द्र दुलालको उपस्थितिमा भएको भेटघाटमा दुई देशबीचको सम्बन्ध, हमासको कब्जामा रहेका नेपाली युवा विपीन जोशीको रिहाई, सूचना प्रविधि र कृषिमा नेपाली युवालाई इजरायलमा रोजगारीको अवसरलगायतका विषयमा छलफल भएको थियो ।
भेटमा विराटनगर र इजरायलको वीर शिभा सहरबीच भगिनी सम्बन्ध स्थापना गर्न पहल गर्ने राजदूत बासले बताएका थिए । सो अवसरमा मेयर कोइरालाले इजरायल र इरानबीचको युद्धका क्रममा आफूलाई इजरालयबाट स्वदेश फर्काउन सहयोग गरेकोमा राजदूतमार्फत इजरायल सरकारलाई धन्यवाद व्यक्त गरेका थिए ।
