विराटनगर । जिल्ला प्रशासन कार्यालय मोरङको कार्यसम्पादनमा सुधार भएको छ । गृह मन्त्रालयले गरेको कार्यसम्पादन मूल्यांकनमा जिल्ला प्रशासन कार्यालय मोरङ सातौंमा परेको हो ।
आर्थिक वर्ष २०८१–८२ को चौथो त्रैमासिक ( वैशाख–असार) अवधिको मन्त्रालयले मंगलबार सार्वजनिक गरेको नतिजामा जिल्ला प्रशासन कार्यालय मोरङ २९.२५ अंक प्राप्त गरेको छ ।
मोरङको प्रमुख जिल्ला अधिकारीमा अहिले सहसचिव इन्द्रदेव यादव छन् । गत पुस २३ गते सरुवा भएर मोरङको प्रमुख जिल्ला अधिकारीको जिम्मेवारीमा रहेका यादव आएसँगै यसका सुधार भएको हो ।यसअघि मोरङ ५८ औं नम्वरमा रहेको थियो ।
शान्तिसुरक्षा, विपद् व्यवस्थापन, समन्वय, सेवा प्रवाह लगायतका सूचकका आधारमा गृह मन्त्रालयले मूल्यांकन हुन्छ । कोशी प्रदेशको धनकुटा जिल्ला कार्यसम्पादनमा पहिलो भएको छ । उसले ३२ पूर्णाङ्कमा ३०.०६२ प्रतिशत प्राप्त गरेको छ । धनकुटा पहिलो हुँदा कोशी प्रदेशकै पाँचथर जिल्ला कार्यसम्पादनमा कमजोर हुँदै ७७ औं नम्वरमा पुगेको छ । उसले १४.३१ प्रतिशत प्राप्त गरेको छ ।
