विराटनगर मङ्सिर २८ , नेपाली कांग्रेसका नेता तथा पूर्वमन्त्री आमोदप्रसाद उपाध्यायको निधन भएको छ। लामो समयदेखि क्यान्सर रोगबाट पीडित उपाध्यायको ९२ वर्षको उमेरमा गए राति निधन भएको हो।
केही वर्षयता सक्रिय राजनीतिबाट टाढा रहँदै आएका उपाध्याय उपचारका क्रममा रहनु भएको थियो। स्वास्थ्य अवस्था कमजोर बन्दै गएपछि उहाँलाई नियमित उपचार र हेरचाह गरिँदै आएको थियो।
विराटनगर महानगरपालिका–७ का स्थायी बासिन्दा उपाध्याय नेपाली कांग्रेसका एक अनुभवी र सम्मानित नेता मानिनुहुन्थ्यो। उहाँले आफ्नो राजनीतिक जीवनमा विभिन्न जिम्मेवारी सम्हाल्दै पार्टी र मुलुकको राजनीतिक विकासमा योगदान पुर्याउनु भएको थियो।
उपाध्यायको निधनप्रति नेपाली कांग्रेसका नेता, कार्यकर्ता तथा शुभेच्छुकहरूले गहिरो दुःख व्यक्त गर्दै उहाँको योगदानको स्मरण गरेका छन्। उहाँको निधनले पार्टी र समग्र राजनीतिक क्षेत्रले एक अनुभवी र समर्पित नेताको अभाव महसुस गरेको छ।
