विराटनगर । गत हप्ता ह्वात्तै चिसो हुँदाहुँदै घाम लागेर न्यानो भएको विराटनगरको मौसम शनिबार साँझदेखि पुनः चिसो हुन थालेको छ । आइतबार देशभर पश्चिमी वायूको प्रभावका कारण तराई क्षेत्रमा हुस्सु र कुहिरोले चिसो बढाएको छ । बिहानदेखि साँझसम्म दिनभर मौसम चिसो नै रह्यो ।
जल तथा मौसम विज्ञान मौसम पूर्वानुमान महाशाखाका अनुसार दिनभर तराई भूभागका अधिकांश स्थानमा हुस्सु–कुहिरो रहेको छ । तर, विराटनगरमा चिसो बढेपनि अहिले अस्पतालमा मौसमी बिरामीको चाप छैन । कोशी अस्पताल विराटनगर मेडिकल सुपरिटेन्डेन्ट रुणा झाले यस पटक चिसो बढेपछि बिरामीको चाप कम रहेको बताइन् । उनले ज्येष्ठ नागरिक, बालबालिका र दम रोगीहरुलाई विशेष ख्याल राख्ना अनुरोध गरिन् । उनले चिसोबाट प्रभावित बिरामीको संख्या यस पटक कम रहेको र अस्पतालको ओपीडी नै खाली रहेको सुनाइन् ।
जाडो बढेसँगै विराटनगरका विद्यालय बन्द गरिदिनुपर्ने अघिल्लो वर्षहरुमा अभिभावकको माग हुने गरेको थियो । तर, यस पटक अहिलेसम्म विराटनगरका विद्यालय बन्द हुनुपर्छ भन्ने माग महानगरपालिकाको शैक्षिक प्रशासन महाशाखासम्म पुगेको छैन । महाशाखाका प्रमुख राम ढुंगेलले जाडोका कारण बालबालिकालाई विद्यालयमा असर परेको भन्ने गुनासो नआएको सुनाए । उनले पुस २२ गतेदेखि दोस्रो त्रैमासिक परीक्षा रहेकोले दैनिक दुई घण्टा मात्रै विद्यालय लाग्ने स्थिति रहेको बताए । त्यसमा पनि बिहान पनि हतार कम र दिनभर पनि विद्यालयमै रहनुपर्ने बाध्यतामा बालबालिका नरहने उनको भनाई छ ।
कोशी प्रदेशका पहाडी तथा हिमाली भागका साथै गण्डकी र कर्णाली प्रदेशका उच्च पहाडी तथा हिमाली भागमा आंशिक बदली रही बाँकी भागमा मौसम सफा रहने महाशाखाद्वारा जारी बुलेटिनमा उल्लेख गरिएको छ । कोशी, गण्डकी र कर्णाली प्रदेशका उच्च पहाडी तथा हिमाली भागका एकदुई स्थानमा हल्का वर्षा र हिमपातको सम्भावना समेत औल्याइएको छ ।
दिउँसो मात्रै नभई राति पनि तराई भागका धेरै स्थानमा कुहिरो लाग्ने जनाइएको। कोशी प्रदेशका पहाडी तथा हिमाली भागमा आंशिक बदली रही बाँकी भागमा मौसम सफा रहने छ । कोशी, गण्डकी र कर्णाली प्रदेशका उच्च पहाडी तथा हिमाली भागका एकदुई स्थानमा हल्का वर्षा र हिमपातको सम्भावना छ। चिसोको प्रभाव रहँदा दैनिक जनजीवन, पर्यटन, स्वास्थ्य तथा सडक यातायातमा आंशिक प्रभाव पर्ने देखिएकाले आवश्यक सतर्कता अपनाउन महाशाखाले अनुरोध गरेको छ।
