विराटनगर, २१ मङ्सिर । विराटनगरको बुधनगरमा निर्माणाधिन एकीकृत भन्सार जाँच चौकी आंशिक सञ्चालनमा आएको छ ।
भारतीय विदेश मन्त्रालयले एकीकृत भन्सार जाँच चौकी भएर खाली गाडी जान दिएपछि आंशिक रुपमा भन्सार सञ्चालनमा आएको हो । हिजोबाट भारततर्फ खाली ट्रक, ट्यांकर र लरी जान थालेका छन । विराटनगर भन्सार नाका भएर दैनिक ३ सय मालवाहक गाडी नेपाल भित्रिने गरेका छन् भने करिब २ सय ५० वटा खाली गाडी भारत तर्फ जाने गरेका छन् ।करिब दुई वर्ष अघि नै भारत तर्फको निर्माण कार्य सम्पन्न भएपनि एकीकृत भंसार जाँच चौकीको नेपाल तर्फको निर्माण कार्य अझै सम्पन्न हुन सकेको छैन ।
