विराटनगर, १९ जेठ । स्कुल स्तरमा गायन र नृत्य क्षेत्रका पारखीहरुको लागी प्याब्सन आँगन हुने भएको छ ।
‘सदाको शिक्षा सबैको लागि : राष्ट्रको शिक्षा कलाको लागि’ भन्ने नारालाई मूलमन्त्र मान्दै प्याब्सन विराटनगरले प्याब्सन आँगन कार्यक्रम गर्न लागेको हो ।
स्कुल स्तरमा अध्ययनरत विद्यार्थीहरुका लागी एकल खुला गायन तथा नृत्य प्रस्तुत हुने प्याब्सन विराटनगर अध्यक्ष इन्द्र राईले आवर विराटनगरलाई जानकारी दिए ।
प्याप्सन विराटनगरमा आवद्ध स्कुलका विद्यार्थी जो कोहीले सहभागीता जनाउन सक्ने अध्यक्ष राईले बताए । पहिलो अडिसन आगामी जेठ ३२ गतेबाट हुने भएको छ । अडिसनबाट छनौट भएका विद्यार्थीहरुले विभिन्न चरण पार गरेपछि फाईनल राउण्डमा पुग्नेछन् ।
फाईनल राउण्डमा पुगेका टप टेन सबैलाई सिल्ड र पुरस्कार प्रदान गरिने आयोजकले जनाएको छ । विजेतालाई नगद १५ हजार र आकर्षक पुरस्कारहरु प्रदान गरिने भएको छ । साथै फाईनल राउण्ड आगामी साउनको अन्त्यमा हुने जनाईएको छ ।
