पेशीमा आएका अभियुक्तउपर अदालत परिसरभित्रै सांघातिक हमला गर्ने विराटनगरका चर्चित दुई अभियुक्तलाई छुटाउन पुनरावेदन अदालत विराटनगरकै एक न्यायाधीश सक्रिय भएका छन् । अभियुक्त अभिषेक गिरीउपर अदालतभित्रै सांघातिक हमला गरी ज्यान मार्ने उद्योग गरेको अभियोगमा पुर्पक्षका लागि थुनामा रहेका देवानन्द यादव र मुकेश बुढाथोकीलाई थुनामुक्त गर्नुपर्ने भन्दै न्यायाधीश कुमार चुडालले राय बझाएका हुन् । अर्का न्यायाधीश रेवन्तबहादुर कुँवरले जिल्ला अदालतले पुर्पक्षका लागि थुनामा राख्न भनी गरेको आदेश मनासिब रहेको राय प्रकट गरेका छन् ।
घटना विवरणअनुसार झुम्कास्थित क्षेत्रीय कारागारमा रहेका अभियुक्त गिरीलाई गत जेठ १८ गते यादव र बुढाथोकीसहितका व्यक्तिहरूले मोरङ जिल्ला अदालतभित्र आक्रमण गरेका थिए । यसका विरूद्ध अभिषेकपत्नी अनिशाले मोरङ प्रहरीले जाहेरी दर्ता गर्न नमानेपछि हुलाक कार्यालयमार्फत्बाट जिल्ला प्रशासन कार्यालय हुँदै जाहेरी दर्ता गरिएको थियो ।
उक्त मुद्दामा मोरङ जिल्ला अदालतले गत भदौ महिनामा यादव र बुढाथोकीलाई पुर्पक्षका लागि थुनामा राख्ने आदेश दिएको थियो । उक्त आदेश बदर गरी पाऊँ भन्दै यादव र बुढाथोकीले पुनरावेदनमा रिट दर्ता गरेका थिए ।
कानुन व्यवसायीका अनुसार दुई न्यायाधीशमा एक अर्काबीच राय बाझिएपछि पुनरावेदन अदालतका मुख्य न्यायाधीश वा उनले तोकेको तेस्रो न्यायाधीशसमक्ष मुद्दा पेश हुन्छ । त्यसपछिको निर्णय अन्तिम हुन्छ ।
यादव र बुढाथोकीलाई छुटाउन नेकपा एमालेका ओलीसमर्थित एक केन्द्रीय नेता गत हप्ता विराटनगर आएर तीन बसेका थिए । हाटखोलास्थित विराटनगर कारागारमा रहेका बुढाथोकी र यादव आफूहरू छुट्ने पक्का भएको भन्दै शुक्रबार बिहान नै झोला कसेर तयार थिए ।
